Aqtóbe oblysynda 10 kásipker deldaldyq jeliler tiziminen shyǵaryldy, dep habarlaıdy “Adyrna” ulttyq portaly “Moı gorod” saıtyna silteme jasap.
“Kásipkerlik basqarmasy baǵany negizsiz kóterip júrgen deldaldardy anyqtaý úshin komıssııa qurdy. Monıtorıng nátıjeleri boıynsha birqatar zań buzýshylyqtar anyqtaldy. Saýda baǵasyn asyryp, taýaryn baǵasyn kórsetpeı satqan úsh kásipkerge aıyppul salynsa, qalǵandaryna eskertý jasaldy. Sondaı-aq, 10 kásipker ónimsiz deldal tizbeginen shyǵaryldy», - deıdi oblystyq aýyl sharýashylyǵy jáne jer qatynastary basqarmasynyń basshysy Qusaıyn Sársembaı.
Oblys ákimdiginiń habarlaýynsha, áleýmettik mańyzy bar azyq-túlik taýarlarynyń baǵasyn turaqtandyrýǵa 2018-2023 jyldar aralyǵynda 4,5 mlrd teńge bólindi. Turaqtandyrý qory quryldy, onyń operatory «Aqtóbe ÁKK» AQ.
“Turaqtandyrý qorynda 31 tonna qaraqumyq, 300 tonna qant, 560,3 tonna birinshi surypty un jáne 68 tonna kúrish ónimderi bar. Ótken jyldyń sáýir aıynan beri áleýmettik nan baǵasynyń qymbattaýyna jol bermeý maqsatynda oblystaǵy iri naýbaıhanalarǵa 4604 tonna birinshi surypty un bólingen. Qazir 550 grammdyq bólke nan 86 teńgeden satylýda. Jalpy, áleýmettik ónimderdiń baǵasyn turaqtandyrý maqsatynda saýda jelileri men dúkendermen 500-den astam memorandýmǵa qol qoıyldy. Nátıjesinde "Anvar" jáne "Sapa Market" jelilerimen azyq – túlik ónimderine baǵalyq ústemeaqyny 5 paıyzǵa, aýdandardaǵy dúkenderde 10 paıyzdan asyrmaýǵa ýaǵdalasty", - dedi Qusaıyn Sársembaı.
“Adyrna” ulttyq portaly
