​Qyzdyń JASAÝYNA myna EKI zatty qosýǵa BOLMAIDY

25383
Adyrna.kz Telegram

«Jasaýy jaqsy qyzdyń tili uzyn bolady» deıdi.  Mássaǵan! Muny aıtatyn aqyly, kórsetetin ónegesi bar degen apalarymnyń aýzynan estip «shok» boldym. Shynynda da qyzdyń mártebesi men mereıin ósiretin artynan kelgen jasaýy ma álde kelgen úıime qut bolaıyn, óseıin, óneıin, urpaǵyn kóbeıtip, aq jaýlyqty áje bolaıyn degen nıet pe?! Búginde qyzynyń jasaýyna turmystyq zattar, jeńil kólik, tipti páter qosyp jatqan jomart ákeler bar. Sonyń biri úlken ápkem men jezdem. Tuńǵyshtary Tumardy Shymkent qalasyna uzatyp jatyr. Endi toıǵa daıyndyqtaryn kórseńiz, qyp-qyzyl shyǵyn. Eki jaqtyń qudalary jastarǵa úı jasap, birden enshisin bereıik dep ózara kelisken eken. Jigit jaǵy páter satyp alyp, ishi-syrtyn jóndeıdi. Al bizdikiler úıdiń ishin jıhazdarmen jabdyqtaýdy mindetine alypty. Soǵan jezdem baryn salyp, eń sońǵy úlgidegi jıhazdarǵa tapsyrys berip, qyzynyń jasaýyn jabdyqtaýǵa kiristi. Búgin bárimizdiń basymyzdy qosyp qyzdyń jasaýyn kórsetip jatyr. Biz de uzatylatyn qyzǵa ataǵanymyzdy berip, jınalyp otyrmyz. Ápkemniń uzaq jyldar boıy ydys-aıaq satatyny olja boldy. Tumardyń jasaýynda biz kórmegen san túrli ydys-aıaq bar. Qamyr asatyn qazan, qýyrdaq jasaıtyn qazan... dep on saýsaqpen sanadyq. Pyshaq, qasyq-shanyshqynyń altyny da, kúmisi de bar, aǵash ydystyń jıyntyǵynan kóz súrinedi. Al dastarhandaryna sóz joq. Jıylǵannyń bári aýzyn ashyp, tamsanyp otyr. Budan bólek turmystyq tehnıkanyń bárin túgeldegen. Tipti, ydys-aıaq jýatyn mashınaǵa deıin alypty.

...Qyzymdy oqyttym. Dıplom da áperdim, jalaqysy jaqsy jumysqa da ornalastyrdym. Kúıeý balam da osal emes. Bildeı prokýror. Maǵan budan artyq baqyt bar ma, - dep jezdekem birde maqtanyp, birde marqaıyp otyrdy. Tumardyń kólik aıdaıtynyna da 2-3 jyl bolyp qaldy. Sóz arasynda kólikti de aýystyrǵanyn estip qaldyq. Munyń bárine qutty bolsyn aıtyp, tileýlestigimizdi bildirip otyrmyz. Biraq, jezdemniń anasy munyń eshbirin unatyp otyrǵan joq. Jasyratyny joq, jezdemniń anasyna qarap naǵyz aq jaýlyqty, salıqaly anany kóremin. Basyndaǵy oramaly, kóp sóılemeıtin sabyrlylyǵy, bata bergendegi shyn nıeti kádimgideı tańdaı qaqtyratyn. Qyzdyń jasaýymen tanysyp bolǵasyn, as jep, dastarhanǵa bata qaıyratyn kezde ǵana qudaǵıymyz sóz aldy. Kelgenderge alǵysyn bildirip, nemeresiniń baqytty bolýyn bizben birge tiledi.

...Sabyrjan balam, Inabat kelinim! Nemerem Tumarǵa senderdiń joldaryńdy bersin! Baǵy ashylyp, ósip-ónsin. Máýeli aǵashtaı jaıqalsyn! Meniń qyzym naıman eliniń aıtýly kelini, aq jaýlyqty anasy, aq samaıly ájesi bolsyn! dep daýsy dirildeı, kózine jas aldy. Jezdem anasynyń ıyǵynan qushaqtap, qýanyshtyń kóz jasy ekenin aıtyp ózi de jasyn syǵyp aldy. Ulynyń mańdaıynan súıgen qudaǵı artyq demeseń óz oıymdy qosaıyn dep ulynyń jaýabyn kútpeı sóz bastady: «Baqyttyń – dúnıemen ólshenbeıtinin balaǵa úıret. Oqyttyń, dıplom áperdiń, jumysqa ornalastyrdyń. Endi qutty ornyna qondyryp, ata-analyq paryzdaryńdy ótep jatsyńdar. Jastar eńbektensin, mańdaı terin tógip dúnıe tapsyn. Sonda joq pen bardyń qadirine jetedi. Iá, jasaýǵa ne qossań da artyq etpeıdi. Biraq, búgingi jastarǵa bárin jasap berip, qatty qatelesip júrmiz. Qazaqta qyzdyń jasaýyna mindetti túrde júkaıaq bergen. Onyń ústine quraq kórpe, kórpeshe, jastyq syndy júk jınalady. Ájelerimiz uzatylatyn qyzynyń «baǵy ashylyp, basy quralsyn, tabysy eselenip, berekesi artsyn» degen yrymmen bárine quraq tikken. Al sender sandyqtyń ornyn júk jınaıtyn «kýpe» esikti shkafqa, quraq kórpeni sıntepon kórpelerge aıyrbastadyńdar. Jasaýǵa beriletin árbir zattyń óz salmaǵy men máni bolady. Al qazan men pyshaqty jasaýǵa qospaıdy. foto: priceguard.ru Óıtkeni qazaq halqy qazanda yrys pen bereke bar dep sengen. Úıimniń yrysy, bosaǵamnyń berekesi, otbasymnyń nesibesi qazanda bolady dep, ózgelerge bermegen. Sol sekildi uzatylatyn qyzǵa da qazan bermeıdi. Keı elder jasaýyna qazan alyp kelgen kelinderdi jaqtyrmaıdy. Ol «kelmeı jatyp qazanymdy bıleıin degen eken» dep jamanǵa balaıdy.

Pyshaqta da aıtarlyqtaı sóz jatyr. Pyshaqtyń júzi ótkir, qaýipti zat bolǵandyqtan, jańa qudalardyń arasyna salqyndyq salmasyn, jas kelinniń tili ótkir bolmasyn dep, jańa qudalar pyshaq alǵandy unatpaıdy. Pyshaq ákelgen kúnniń ózinde «satyp alý» yrymyn jasaıdy. Bilmeseńder, bir aýyz surańdar. Aıtýdan bizder jalyqpaımyz» dedi qudaǵıymyz. Osyndaǵylardyń bári ańtarylyp qaldyq. Ápkem de bir sózge kelmesten, qatardaǵy qazan pen pyshaqty shetke alyp qoıdy. Aqyl aıtyp, jónimenen jol kórseter ene men tilalǵysh kelinge qarap, qyzyǵyp-aq qaldyq.

 

Jazyp alǵan - Asyl Arman

"Adyrna" ulttyq portaly

Pikirler