«جاساۋى جاقسى قىزدىڭ ءتىلى ۇزىن بولادى» دەيدى. ماسساعان! مۇنى ايتاتىن اقىلى، كورسەتەتىن ونەگەسى بار دەگەن اپالارىمنىڭ اۋزىنان ەستىپ «شوك» بولدىم. شىنىندا دا قىزدىڭ مارتەبەسى مەن مەرەيىن وسىرەتىن ارتىنان كەلگەن جاساۋى ما الدە كەلگەن ۇيىمە قۇت بولايىن، وسەيىن، ونەيىن، ۇرپاعىن كوبەيتىپ، اق جاۋلىقتى اجە بولايىن دەگەن نيەت پە؟! بۇگىندە قىزىنىڭ جاساۋىنا تۇرمىستىق زاتتار، جەڭىل كولىك، ءتىپتى پاتەر قوسىپ جاتقان جومارت اكەلەر بار. سونىڭ ءبىرى ۇلكەن اپكەم مەن جەزدەم. تۇڭعىشتارى تۇماردى شىمكەنت قالاسىنا ۇزاتىپ جاتىر. ەندى تويعا دايىندىقتارىن كورسەڭىز، قىپ-قىزىل شىعىن. ەكى جاقتىڭ قۇدالارى جاستارعا ءۇي جاساپ، بىردەن ەنشىسىن بەرەيىك دەپ ءوزارا كەلىسكەن ەكەن. جىگىت جاعى پاتەر ساتىپ الىپ، ءىشى-سىرتىن جوندەيدى. ال بىزدىكىلەر ءۇيدىڭ ءىشىن جيھازدارمەن جابدىقتاۋدى مىندەتىنە الىپتى. سوعان جەزدەم بارىن سالىپ، ەڭ سوڭعى ۇلگىدەگى جيھازدارعا تاپسىرىس بەرىپ، قىزىنىڭ جاساۋىن جابدىقتاۋعا كىرىستى. بۇگىن ءبارىمىزدىڭ باسىمىزدى قوسىپ قىزدىڭ جاساۋىن كورسەتىپ جاتىر. ءبىز دە ۇزاتىلاتىن قىزعا اتاعانىمىزدى بەرىپ، جينالىپ وتىرمىز. اپكەمنىڭ ۇزاق جىلدار بويى ىدىس-اياق ساتاتىنى ولجا بولدى. تۇماردىڭ جاساۋىندا ءبىز كورمەگەن سان ءتۇرلى ىدىس-اياق بار. قامىر اساتىن قازان، قۋىرداق جاسايتىن قازان... دەپ ون ساۋساقپەن سانادىق. پىشاق، قاسىق-شانىشقىنىڭ التىنى دا، كۇمىسى دە بار، اعاش ىدىستىڭ جيىنتىعىنان كوز سۇرىنەدى. ال داستارحاندارىنا ءسوز جوق. جيىلعاننىڭ ءبارى اۋزىن اشىپ، تامسانىپ وتىر. بۇدان بولەك تۇرمىستىق تەحنيكانىڭ ءبارىن تۇگەلدەگەن. ءتىپتى، ىدىس-اياق جۋاتىن ماشيناعا دەيىن الىپتى.
...قىزىمدى وقىتتىم. ديپلوم دا اپەردىم، جالاقىسى جاقسى جۇمىسقا دا ورنالاستىردىم. كۇيەۋ بالام دا وسال ەمەس. بىلدەي پروكۋرور. ماعان بۇدان ارتىق باقىت بار ما، - دەپ جەزدەكەم بىردە ماقتانىپ، بىردە مارقايىپ وتىردى. تۇماردىڭ كولىك ايدايتىنىنا دا 2-3 جىل بولىپ قالدى. ءسوز اراسىندا كولىكتى دە اۋىستىرعانىن ەستىپ قالدىق. مۇنىڭ بارىنە قۇتتى بولسىن ايتىپ، تىلەۋلەستىگىمىزدى ءبىلدىرىپ وتىرمىز. بىراق، جەزدەمنىڭ اناسى مۇنىڭ ەشبىرىن ۇناتىپ وتىرعان جوق. جاسىراتىنى جوق، جەزدەمنىڭ اناسىنا قاراپ ناعىز اق جاۋلىقتى، ساليقالى انانى كورەمىن. باسىنداعى ورامالى، كوپ سويلەمەيتىن سابىرلىلىعى، باتا بەرگەندەگى شىن نيەتى كادىمگىدەي تاڭداي قاقتىراتىن. قىزدىڭ جاساۋىمەن تانىسىپ بولعاسىن، اس جەپ، داستارحانعا باتا قايىراتىن كەزدە عانا قۇداعيىمىز ءسوز الدى. كەلگەندەرگە العىسىن ءبىلدىرىپ، نەمەرەسىنىڭ باقىتتى بولۋىن بىزبەن بىرگە تىلەدى.
...سابىرجان بالام، ينابات كەلىنىم! نەمەرەم تۇمارعا سەندەردىڭ جولدارىڭدى بەرسىن! باعى اشىلىپ، ءوسىپ-ءونسىن. ماۋەلى اعاشتاي جايقالسىن! مەنىڭ قىزىم نايمان ەلىنىڭ ايتۋلى كەلىنى، اق جاۋلىقتى اناسى، اق سامايلى اجەسى بولسىن! دەپ داۋسى دىرىلدەي، كوزىنە جاس الدى. جەزدەم اناسىنىڭ يىعىنان قۇشاقتاپ، قۋانىشتىڭ كوز جاسى ەكەنىن ايتىپ ءوزى دە جاسىن سىعىپ الدى. ۇلىنىڭ ماڭدايىنان سۇيگەن قۇداعي ارتىق دەمەسەڭ ءوز ويىمدى قوسايىن دەپ ۇلىنىڭ جاۋابىن كۇتپەي ءسوز باستادى: «باقىتتىڭ – دۇنيەمەن ولشەنبەيتىنىن بالاعا ۇيرەت. وقىتتىڭ، ديپلوم اپەردىڭ، جۇمىسقا ورنالاستىردىڭ. ەندى قۇتتى ورنىنا قوندىرىپ، اتا-انالىق پارىزدارىڭدى وتەپ جاتسىڭدار. جاستار ەڭبەكتەنسىن، ماڭداي تەرىن توگىپ دۇنيە تاپسىن. سوندا جوق پەن باردىڭ قادىرىنە جەتەدى. ءيا، جاساۋعا نە قوسساڭ دا ارتىق ەتپەيدى. بىراق، بۇگىنگى جاستارعا ءبارىن جاساپ بەرىپ، قاتتى قاتەلەسىپ ءجۇرمىز. قازاقتا قىزدىڭ جاساۋىنا مىندەتتى تۇردە جۇكاياق بەرگەن. ونىڭ ۇستىنە قۇراق كورپە، كورپەشە، جاستىق سىندى جۇك جينالادى. اجەلەرىمىز ۇزاتىلاتىن قىزىنىڭ «باعى اشىلىپ، باسى قۇرالسىن، تابىسى ەسەلەنىپ، بەرەكەسى ارتسىن» دەگەن ىرىممەن بارىنە قۇراق تىككەن. ال سەندەر ساندىقتىڭ ورنىن جۇك جينايتىن «كۋپە» ەسىكتى شكافقا، قۇراق كورپەنى سينتەپون كورپەلەرگە ايىرباستادىڭدار. جاساۋعا بەرىلەتىن ءاربىر زاتتىڭ ءوز سالماعى مەن ءمانى بولادى. ال قازان مەن پىشاقتى جاساۋعا قوسپايدى. فوتو: priceguard.ru ويتكەنى قازاق حالقى قازاندا ىرىس پەن بەرەكە بار دەپ سەنگەن. ءۇيىمنىڭ ىرىسى، بوساعامنىڭ بەرەكەسى، وتباسىمنىڭ نەسىبەسى قازاندا بولادى دەپ، وزگەلەرگە بەرمەگەن. سول سەكىلدى ۇزاتىلاتىن قىزعا دا قازان بەرمەيدى. كەي ەلدەر جاساۋىنا قازان الىپ كەلگەن كەلىندەردى جاقتىرمايدى. ول «كەلمەي جاتىپ قازانىمدى بيلەيىن دەگەن ەكەن» دەپ جامانعا بالايدى.
پىشاقتا دا ايتارلىقتاي ءسوز جاتىر. پىشاقتىڭ ءجۇزى وتكىر، قاۋىپتى زات بولعاندىقتان، جاڭا قۇدالاردىڭ اراسىنا سالقىندىق سالماسىن، جاس كەلىننىڭ ءتىلى وتكىر بولماسىن دەپ، جاڭا قۇدالار پىشاق العاندى ۇناتپايدى. پىشاق اكەلگەن كۇننىڭ وزىندە «ساتىپ الۋ» ىرىمىن جاسايدى. بىلمەسەڭدەر، ءبىر اۋىز سۇراڭدار. ايتۋدان بىزدەر جالىقپايمىز» دەدى قۇداعيىمىز. وسىنداعىلاردىڭ ءبارى اڭتارىلىپ قالدىق. اپكەم دە ءبىر سوزگە كەلمەستەن، قاتارداعى قازان پەن پىشاقتى شەتكە الىپ قويدى. اقىل ايتىپ، جونىمەنەن جول كورسەتەر ەنە مەن تىلالعىش كەلىنگە قاراپ، قىزىعىپ-اق قالدىق.
جازىپ العان - اسىل ارمان
"ادىرنا" ۇلتتىق پورتالى
