Qulsary qalasynda sý basqan 1200-den astam úıdi baǵalaý nátıjeleri daıyndaldy. Tek bir táýliktiń ishinde mobıldi toptar turǵyndarǵa 300-ge jýyq baǵalaý paraǵyn taratty. Bul týraly Tótenshe jaǵdaılar jónindegi jedel shtab jarııalady, dep habarlaıdy “Adyrna” ulttyq portaly.
Búgingi tańda jumys komıssııasy 1200 nysandy baǵalaý nátıjelerin daıyndady. Onyń ishinde úıi sýǵa ketken 357 turǵyn ótemaqy alý týraly kelisimge qol qoıdy, 109 turǵynnyń jeke shottaryna ótemaqy qarajaty aýdaryldy.
Qulsary qalasynyń turǵyny Nurshat Áýelbaevanyń aıtýynsha, baǵalaý kompanııasy eseptep, usynǵan qarajat onyń ishki esebimen sáıkes kelgen.
«Meniń úıim apatty dep tanyldy. Ol úıdi tek buzýǵa kerek. Zardap shekken úıimniń qunyn ádil baǵalaǵandaryna rızamyn, memleketten túsetin ótemaqy shyǵynymdy tolyǵymen jabady. Alynǵan aqshalaı ótemaqyǵa jańa úı satyp alamyn. Nemese jańa úı salýym da múmkin. Qazir biz bul máseleni otbasymyzben osy máseleni talqylap jatyrmyz», - dedi Nurshat Áýelbaı.
Qulsary qalasynyń taǵy bir turǵyny Kúnzıra Tájiǵulova aqshalaı ótemaqyǵa jańa turǵyn úı satyp alýǵa nıetti.
«Úıimdi basqan sýdyń kólemi eki metr deńgeıinde saqtalyp turdy. Aıaq astynan apattyq jaǵdaıǵa jetken úıimdi ádil baǵalaǵandary úshin rahmet aıtamyn. Endi ol úıdi alańsyz buzýǵa bolady. Onyń ornyna jańa turǵyn úı satyp alamyz dep otyrmyz», - dedi Kúnzıra Tájigulova.
Zardap shekken múlikti baǵalaý jumystaryn osy aptanyń sońyna deıin aıaqtaý josparlanýda.
Búginde qala boıynsha jıyrma mobıldi top kúsheıtilgen rejımde jumys isteýde. Mamandar úıdi aralaýdy jáne zalaldy baǵalaý men zardap shekken múlikke tehnıkalyq saraptama qorytyndylaryn túsindirýdi jalǵastyrýda. Mobıldi toptardyń jumysy barlyq baǵalaý jumystary tolyq aıaqtalǵanǵa deıin kún saıyn demalyssyz júrgiziletin bolady.
Qulsary qalasyndaǵy № 20 mektep bazasynda úıleri apatty dep tanylǵan turǵyndarǵa túsindirý jumystaryn júrgizý jalǵasýda. Sondaı aq, sý tasqynynan zardap shekkenderge aqshalaı ótemaqy tóleý boıynsha aqparat berilýde.
Sý tasqyny kezinde zardap shekken turǵyndarmen arada aqshalaı ótemaqy tóleý boıynsha kelisimder jasasý boıynsha jumystar Jylyoı aýdanynyń mádenıet úıinde júrgizilýde.
