Qazaqstan úkimeti "qajet bolǵan jaǵdaıda" Reseıge janar-jaǵarmaı jetkizý týraly kelisimniń bolǵanyn moıyndady, dep habarlaıdy “Adyrna” ulttyq portaly.
Bul aqparatty mereke qarsańynda Premer-mınıstrdiń baspasóz qyzmeti málimdedi.
«Úkimet deńgeıinde qajet bolǵan jaǵdaıda reseılik tarappen janar-jaǵarmaı jetkizý týraly kelisimder bar ekeni aıtyldy», - delingen resmı habarlamada.
Qazaqstan Premeriniń birinshi orynbasary Roman Sklıar ishki naryqta janar-jaǵarmaı tapshylyǵyn boldyrmaý jáne olardy respýblıkadan zańsyz áketý áreketteriniń jolyn kesý boıynsha naqty tapsyrmalar bergeni atap ótildi.
Eske sala keteıik, Reseı munaı óńdeý zaýyttaryna jasalǵan shabýyl saldarynan tapshylyq týyndaǵan jaǵdaıda Qazaqstannan 100 myń tonna benzın jetkizýge daıyn turýyn suraǵan edi. Alaıda Reuters-tiń 8 sáýirindegi aqparatyn Qazaqstan Respýblıkasynyń Energetıka mınıstriniń keńesshisi Shyńǵys Ilııasov joqqa shyǵarǵan. Ol Energetıka mınıstrligine reseılik áriptesinen mundaı suranys túspegenin aıtqan edi.
Reseı ádette janarmaıdyń netto – eksporteri (ıaǵnı, eksport kólemi ımportynan artyq) jáne halyqaralyq naryqtarǵa jetkizýshi bolyp tabylady. Biraq munaı óńdeý zaýyttarynyń Ýkraına drondarynyń shabýylyna ushyraýy Reseı munaı kompanııalaryn ımport jasaýǵa májbúr etken sııaqty.
Reuters derekkóziniń aıtýynsha, Máskeý Qazaqstannan Reseıge jetkizýge ázir turatyn 100 myń tonna benzınniń tótenshe rezervin qurýdy suraǵan.
Sondaı-aq, Máskeý 1 naýryzdan bastap janarmaı tapshylyǵynyń aldyn alý úshin alty aıǵa benzın eksportyna tyıym salǵan. Degenmen bul Máskeý basqaratyn Eýrazııalyq ekonomıkalyq odaqqa, onyń ishinde Qazaqstanǵa, sondaı-aq Mońǵolııa sııaqty keıbir elderge qatysy joq.
Al treıderler Reseıdegi jaǵdaı ýshyǵyp ketse, tyıymdy keńeıtý múmkin ekenin aıtady.
