Astanada ótip jatqan eks-mınıstr Qýandyq Bıshimbaevtyń isine qatysty sot otyrysyna jýrnalıster qaıtadan tikeleı qatysa alady. Bul týraly búgingi sot barysynda aıtyldy, dep habarlaıdy “Adyrna” ulttyq portaly.
«Alqa bılerdi sot otyrysy zalyna shaqyrmas buryn, tekserý nátıjesinde anyqtalǵandaı olardyń fotolary men vıdeosyn BAQ-ta jarııalaǵan KTK arnasynyń ókilderi ákimshilik jaýapkershilikke tartyldy. Ákimshilik jaza eskertý túrinde qoldanyldy», - dedi sýdıa Aıjan Qulbaeva.
Sondaı-aq, sýdıa jýrnalısterdi sot zalyna kirgizýge ruqsatty daýysqa saldy, Q. Bıshimbaev pen onyń qorǵaýshylary qarsy shyqty, qalǵan jaq qarsylyq tanytpady. Osylaısha sýdıa 10 mınýtqa úzilis jarııalady.
«Sot proesiniń ashyq ótip jatqanyn eskere otyryp, qylmystyq is júrgizý kodeksiniń 29-babynda bekitilgen is júrgizý sotynyń jarııalylyq qaǵıdatyn qamtamasyz etý jáne ádil sot talqylaýy maqsatynda sot buqaralyq aqparat quraldarynyń ókilderin sot zalyna kirýine ruqsat berý qajet dep sanaıdy. Sondaı-aq, KTK arnasy da sot zalyna jol beriledi, óıtkeni buǵan deıin olarǵa qatysty ákimshilik jaýapkershilik qoldanyldy», - deıdi sýdıa.
Eske salaıyq, sottyń tyıym salýyna qaramastan, BAQ-ta jáne áleýmettik jelilerde alqa bılerdiń bet-álpeti beınelengen vıdeo paıda bolǵan edi. Sodan keıin sot BAQ ókilderin sot zalyna kirgizbeý týraly sheshim qabyldady.
