Qyzylorda oblysynda qańtar oqıǵasy kezinde jappaı tártipsizdikke qatysqan er adam sottaldy, dep habarlaıdy “Adyrna” ulttyq portaly.
Qyzylorda oblysynyń qylmystyq ister jónindegi mamandandyrylǵan aýdanaralyq sotynda jappaı tártipsizdikterge qatysyp, áskerı qyzmetshiniń ómirine qol suǵyp, lańkestik áreket jasady dep aıyptalǵan Qazybek Qudaıbergenov esimdi azamatqa qatysty qylmystyq is qaraldy.
Sotta anyqtalǵandaı, 5 qańtarda sottalýshy qaladaǵy saýda úıleriniń biriniń aldynda bolǵan jappaı tártipsizdikke qatysý kezinde áskerı qyzmetshige qarsy kúsh qoldanyp, «KamAZ» áskerı kóligine otyryp alǵan. Kólikke otyrǵannan keıin gaz pedalin sońyna deıin basyp, ony kirpishpen tirep, artynsha kólikti sheginip bara jatqan áskerı qyzmetshiler sapyna qaraı buryp, ózi kólikten sekirip túsken.
Sonyń saldarynan júk kóligi bir áskerı qyzmetshini basyp ketken. Ol alǵan jaraqatynan oqıǵa ornynda kóz jumǵan.
Sottalýshynyń kinási kýálardyń aıǵaqtarymen, qylmystyq is materıaldaryna tirkelgen beınejazbalarmen, sondaı-aq sot-medıınalyq saraptamasynyń qorytyndysymen dáleldendi.
Sot jaýaptylyq pen jazany jeńildetetin jáne aýyrlatatyn mán-jaılardy eskere otyryp, Qudaıbergenovty 17 jylǵa bas bostandyǵynan aıyrý, qylmystyq-atqarý júıesiniń qaýipsizdigi barynsha joǵary mekemelerinde óteý týraly úkim shyǵardy.
Qudaıbergenovtyń ózi aıybyn moıyndaǵan joq. Azattyq onyń sot úkiminen eseńgerip qalǵanyn jáne kóz jasyn tyıa almaǵanyn jazady.
34 jastaǵy Qazybek Qudaıbergenovtyń jaqtastary alty aıǵa sozylǵan sotta onyń advokattary dálelder keltirgenimen sot birde-birin eskermegenin aıtady.
Azattyqtyń jazýynsha, sot úkimi áli kúshine engen joq, eki taraptyń apellıaııalyq shaǵym túsirýge quqyǵy bar.
