Eks-prezıdent Nursultan Nazarbaevtyń jıeni Aqbota Nazarbaeva ıelik etetin «Tolaǵaı-2050» JShS kesirinen 30 myń almatylyq turǵynnyń ómirine qaýip tónip tur, dep habarlaıdy “Adyrna” ulttyq portaly.
TJM aqparatynsha, Aqsaı shatqalyndaǵy seldi ustaıtyn bógetke jaýapty merdiger óz mindettemelerin oryndamaı otyr.
“QR Tótenshe jaǵdaılar mınıstri Shyńǵys Árinov "Aqsaı" basseınindegi seldi ustaıtyn bógetti tekserý kezinde merdigerdiń joǵaryda atalǵan obektini salý boıynsha mindettemelerin oryndamaýyna baılanysty belgili bir buzýshylyqtardy anyqtady (Almaty qalasynyń 30 myńǵa jýyq turǵynynyń ómirine qaýip tónip tur), osyǵan baılanysty "Qazseldenqorǵaý" basshylyǵynyń aldynda tıisti materıaldardy proessýaldyq sheshim qabyldaý úshin QR Qarjy monıtorıngi agenttigine berý týraly másele kóterildi . Onyń nátıjeleri boıynsha QR QMA qylmystyq is qozǵady jáne merdiger uıymnyń jaýapty tulǵalaryna qatysty bıýdjet qarajatyn urlaý boıynsha tergeý júrgizilýde”, delingen mınıstrlik habarlamasynda.
Al, Protenge málimetinshe, nysannyń qurylysyn Aqbota Nazarbaeva ıelik etetin «Tolaǵaı-2050» kompanııasy júrgizgen.
Bógettiń ózi Almaty oblysynyń Qarasaı aýdany men Almatynyń Naýryzbaı aýdanynyń turǵyndaryn qorǵaıdy.
Bóget sapasyz salynǵan, tapsyrys berýshiniń aıtýynsha, qazir synaqtar júrip jatyr, basseınde erigen sý jınalyp jatyr. Bıyl kompanııa memleketpen ondaǵan mıllıard teńgeniń 39 kelisimsharty men qosymsha kelisimderge qol qoıdy, dep jazady ProTenge.
