Oblys äkımı Nariman Töreǧaliev Qaratöbe audanyna jūmys sapary aiasynda Säule auylynda salynǧan jaŋa şaǧyn jinaqty bılım ordasynyŋ aşylu räsımıne qatysty. Aimaq basşysy eldı meken tūrǧyndaryn aituly quanyşpen qūttyqtap, Jaqsybai negızgı orta mektebınıŋ su jaŋa ǧimaraty jas ūrpaqqa berıletın bılım sapasyn jaŋa deŋgeige köteretınıne senım bıldırdı.
- Keiıngı 3 jylda öŋırde 30 mektep jaŋadan salyndy. Biyl kezektı oqu jylynda osyndai taǧy 7 şaǧyn jinaqty mekteptı paidalanuǧa bergelı otyrmyz. Bılım beru infraqūrylymyn damytu, qala men auyl mektepterındegı bılım sapasyndaǧy alşaqtyqty azaitu – Memleket basşysy Qasym-Jomart Kemelūly Toqaevtyŋ naqty tapsyrmasy. Būl jönınde Prezident künı keşe ötken Tamyz konferensiiasynyŋ plenarlyq otyrysynda da aitty. Jas ūrpaqtyŋ alaŋsyz bılım aluy üşın jaǧdai jasau – memlekettıŋ strategiialyq mındetı, - dedı Nariman Töreǧaliev.
Oblys äkımı el tarihyndaǧy tūŋǧyş Qūryltai sailauyna belsene qatysyp, azamattyq jauapkerşılık tanytqany üşın auyl tūrǧyndaryna rizaşylyǧyn jetkızdı. Äleumettık nysandy uaqytyly ärı sapaly salyp bergen qūrylysşylarǧa alǧys hat tabys ettı.
Jaqsybai negızgı mektebı 1973 jyly bastauyş mektep retınde aşylyp, 1991 jyly märtebesı auysqan. Jarty ǧasyrdan astam uaqyt paidalanylǧan ǧimarattyŋ tozyǧy jettı. 60 orynǧa şaqtalǧan su jaŋa nysan KPO b.v. kompaniiasynyŋ äleumettık mındettemelerı aiasynda boi köterdı.
Jaŋa ǧimaratta 10 oqu kabinetı bar. Sondai-aq, 2 şeberhana, kıtaphana, ashana, mäjılıs jäne sport zaldarymen qamtamasyz etılgen. Balalar qauıpsızdıgı üşın 62 beinebaqylau kamerasy men kıreberıske turniket qoiylǧan. Mektep aulasy tolyq abattandyrylǧan. Sport jäne balalar oiyn alaŋdary jasaqtalǧan.
Saltanatty ıs-şaraǧa qatysqan auyl tūrǧyndary igılıktı ıske dän riza ekenın aityp, memleket qoldauy üşın alǧys bıldırdı.
Aita keteiık, jaŋa oqu jylynda negızgı mektepte 69 oquşy bılım alady. Olarǧa 29 pedagog sabaq beredı.
