Almatynyŋ Äuezov audanynda tūrǧyndarǧa aulasy men qoǧamdyq keŋıstıgın damytuǧa tıkelei qatysuǧa mümkındık beretın «Halyq qatysatyn biudjet» baǧdarlamasy aiasyndaǧy jobalardy jüzege asyru jalǧasuda. Biyl audanda 29 joba jüzege asyrylyp jatyr.
Atap aitqanda, Jandosov jäne Däulenov köşelerınıŋ qiylysynda otbasylyq demalys pen sportpen şūǧyldanuǧa arnalǧan zamanaui qoǧamdyq keŋıstık qūryldy. Körkeitu jūmystary aiasynda mūnda şaǧyn säulet nysandary men syrtqy jaryqtandyru baǧanalary ornatylyp, zamanaui balalar oiyn keşenderı, sport jäne vorkaut aimaqtary jabdyqtaldy, sondai-aq aumaqtyŋ jabyny jaŋartyldy.
Audan tūrǧyny Ǧabit Tūrsynbaevanyŋ aituynşa, körkeitu jūmystary aiaqtalǧannan keiın tūrǧyndar jaŋa alaŋda jiı seruendeitın bolǧan.
«Balalarǧa oiyn alaŋy öte ūnaidy, olar oinap jürgende men de alaŋdamai sportpen ainalysa alamyn. Bükıl otbasy üşın şynymen de zamanaui ärı jaily demalys orny paida boldy», – dedı ol.
Taǧy bır joba Tastaq-1 şaǧynaudanynda jüzege asyryldy. Mūnda №24 jäne №26 üilerdıŋ aula aumaqtaryn keşendı körkeitu jūmystary aiaqtaldy.
Jūmys barysynda är jastaǧy balalarǧa arnalǧan zamanaui oiyn keşenderı, ätkenşekter, karuselder, tepe-teŋdık qūraldary, batuttar jäne basqa da oiyn elementterı bar jaŋa oiyn alaŋdary paida boldy. Tūrǧyndardyŋ demalysy üşın kürkeler ornatylyp, sport jäne vorkaut alaŋdary jabdyqtaldy. Sonymen qatar aumaqtyŋ jabyny jaŋartylyp, zamanaui syrtqy jaryqtandyru jüiesı ornatyldy. Būl aulalardy tūrǧyndar üşın barynşa jaily ärı qauıpsız etuge mümkındık berdı.
Bügınde körıktendırılgen aumaq tūrǧyndardyŋ kündelıktı demalysyna arnalǧan tolyqqandy keŋıstıkke ainaldy.
«Bızdıŋ aulamyz adam tanymastai özgerdı. Endı mūnda bükıl otbasymyzben uaqyt ötkızemız: balalar jaŋa alaŋdarda oinaidy, bız körşılerımızben keşkı uaqytta demalamyz, al men nemerelerımmen jiı seruendeimın. Üiımızdıŋ janynda osyndai jaily ärı zamanaui keŋıstıktıŋ paida bolǧanyna quanyştymyn», – dedı audan tūrǧyny Ümıt Ospanova.
Äuezov audanyndaǧy körkeitu jūmystary jalǧasuda. «Halyq qatysatyn biudjet» baǧdarlamasy aiasyndaǧy jobalardy jüzege asyru tūrǧyndardyŋ ūsynysyn eskerıp, demalys, sport jäne bos uaqytty ötkızuge arnalǧan zamanaui, qauıpsız ärı jaily keŋıstıkter qūruǧa mümkındık beredı.
