Reseılik BAQ-ta taraǵan Máskeýdegi lańkestik áreketke kúdikti delingen tájikstandyq úsh azamattyń qylmysqa qatysy joq ekeni aıtyldy, dep habarlaıdy “Adyrna” ulttyq portaly. Bul týraly Tájikstannyń ishki ister mınıstrligi málimdedi.
Vedomstvonyń málimetinshe, Reseıde kúdikti dep atalǵan Rıvodjıddın Islomov pen Mahmadrasýl Nasrıddınov «2023 jyldyń 26 qarashasynda Reseı Federaııasynan Tájikstan Respýblıkasyna kelgen jáne turǵylyqty meken-jaı boıynsha turyp jatyr».
Vedomstvo olardyń sýretterin de jarııalady.
Taǵy bir azamat Rýstam Nazarov «qazir Samarada taksı júrgizýshisi bolyp jumys isteıdi», - dep túsindirdi ishki ister mınıstrligi.
Esterińizge sala keteıik, 22 naýryz kúni keshke Reseıdiń Krokýs Sıtı Hollynda belgisiz bireýler iri terakt jasaǵan bolatyn. Aldyn ala málimet boıynsha, ondaǵan adam qaza taýyp, 100-den astamy jaralanǵan. Krokýs Sıtı Holldaǵy teraktige baılanysty Qazaqstan azamattary úshin senim telefony ashyldy. Prezıdent Qasym-Jomart Toqaev Qazaqstan atynan Máskeýdegi Krokýs Sıtı Holldaǵy lańkestik áreketti qatań aıyptady. Aıta keteıik, Ýkraına lańkestik áreketke qatysy joqtyǵyn birden málim etti.
Al 7 naýryzda Reseı Federaldyq qaýipsizdik qyzmeti "Máskeýdegi sınagogaǵa jasalmaq shabýyldyń aldyn aldyq" dep, yqtımal atysta Qazaqstannyń eki azamaty qaza tapqanyn jarııalaǵan. Reseı jaǵynyń málimetinshe, «Vılaıat Horasan» tobynyń (Islam memleketiniń aýǵanstandyq tarmaǵy bolýy múmkin) músheleri Máskeýdegi sınagogaǵa qarýly shabýylǵa oqtalǵan. Olar Kalýga oblysyndaǵy jeke úılerdiń birinen tabylǵan. Tutqyndaý kezinde kúdiktiler «qarsylyq kórsetip» oq atylǵan. Saldarynan "lańkestik áreketke daıyndaldy" degen eki kúdikti – Qazaqstan azamattary, 35 jastaǵy Sábıt Áshiralıev pen 32 jastaǵy Jánibek Tasqulıev qaza tapqan.
