Ázerbaıjanda Qurmanǵazy ortalyǵy ashylady, dep habarlaıdy "Adyrna" tilshisi.
Memleket basshysynyń Azerı-Press agenttigine bergen suhbatynda aldaǵy josparlarymen bólisti.
Jýrnalıstiń "Baýyrlas Qazaqstan aldaǵy ýaqytta elimizde taǵy qandaı jobalardy júzege asyrýdy josparlap otyr?" degen suraǵyna Toqaev jaýap berdi.
"Biz qazirdiń ózinde Qarabaqtyń qanshalyqty serpindi túrde jandanyp jatqanyn kórip otyrmyz. Bul óńirde kóptegen jumystar atqarylýda. Kólik, áleýmettik jáne týrızm ınfraqurylymy belsendi damyp, áýejaılar, qonaq úıler, turǵyn úıler men mektepter salynýda. Árıne, bul ıgilikti isten biz de qalys qala almadyq.
2022 jyldyń tamyz aıynda Bakýge barǵan saparymda balalar shyǵarmashylyq ortalyǵynyń qurylysy týraly habarlaǵan bolatynmyn. Qazaq halqynyń Ázirbaıjanǵa tartýy retinde Fızýlıde Qurmanǵazy atyndaǵy ortalyq ashylady. Meniń qazirgi saparymnyń baǵdarlamasynda osy Ortalyqtyń resmı ashylýy qarastyrylǵan. Bul mekeme elderimiz ben halyqtarymyzdyń dostyǵynyń, baýyrlastyǵynyń jáne ózara qoldaýynyń taǵy bir sımvolyna aınalary sózsiz", - dedi Prezıdent.
Odan bólek Qasym-Jomart Toqaev aldaǵy ýaqytta Qazaqstan men Ázirbaıjan jańa jobalardy júzege asyratynyn aıtty.
"Buǵan qosa, Qazaqstan Ázirbaıjan men Armenııa arasyndaǵy beıbit kelisimniń tezirek jasalýyna múddeli ekenin atap ótkim keledi.
Qazaqstan halyqaralyq bitimgershilik bastamalardyń bastamashysy jáne qoldaýshysy retinde búkil Eýrazııalyq aımaqtyń beıbit jáne turaqty damýyna baǵyttalǵan kez kelgen kúsh-jigerdi qoldaýǵa daıyn", - dedi Prezıdent.
Qazaqstan Prezıdentiniń tapsyrmasymen salynyp jatqan ǵımarat qurylysy aıaqtalýǵa jaqyn.
