Premer-mınıstr Álıhan Smaıylov Ázirbaıjanǵa resmı saparynda osy eldiń prezıdenti Ilham Álıevpen kezdesti, dep habarlaıdy “Adyrna” ulttyq portaly.
Kezdesý barysynda Qazaqstan men Ázirbaıjan ózara saýda kólemin 1 mlrd dollarǵa deıin jetkizýdi josparlap otyrǵany aıtyldy.
Sondaı-aq, Úkimet basshysy Qasym-Jomart Toqaevtyń ystyq sálemin jetkizip, ázirbaıjan halqynyń kóshbasshysy Geıdar Álıevtiń bıyl atalyp ótiletin 100 jyldyq mereıtoıynyń mańyzy zor ekenin aıtty.
Ol eki el arasyndaǵy qarym-qatynastar senim men ózara túsinistikke negizdelgen strategııalyq áriptestik pen odaqtastyqtyń jarqyn úlgisi ekenin atap ótti.
Ázirbaıjan – Qazaqstannyń Ońtústik Kavkazdaǵy eń mańyzdy saýda-ekonomıkalyq seriktesi. Ótken jyldyń qorytyndysy boıynsha ekijaqty taýar aınalymy 40%-ǵa ósip, $460 mln-nan asty. Bıylǵy 4 aıdyń qorytyndysyna sáıkes ózara saýda aınalymy 185 mln dollar bolyp, 40%-ǵa artty.
Taýar aınalymyn 1 mlrd dollarǵa jetkizý jónindegi aldymyzǵa qoıylǵan mindetke sáıkes, biz Ázirbaıjan Úkimetimen birlesip, saýda-ekonomıkalyq qarym-qatynastardy keńeıtý boıynsha jumys istep jatyrmyz, — dedi Álıhan Smaıylov.
Al Ilham Álıev premer-mınıstrdiń Ázirbaıjanǵa resmı sapary eki el arasyndaǵy dostyq qarym-qatynasty odan ári damytýǵa yqpal etetinine senim bildirdi.
Bizdiń yntymaqtastyǵymyzdyń kún tártibi óte aýqymdy. Ol jyldan jylǵa keńeıip keledi. Prezıdentter deńgeıinde qabyldanǵan kelisimderdiń júzege asyrylyp jatqanyna qýanyshtymyn. Bul eki el arasyndaǵy qarym-qatynastyń óte joǵary deńgeıde ekenin kórsetedi. Sonymen qatar olardy ári qaraı damytý úshin bizde orasan zor áleýet bar. Biz kelisken sharalardy iske asyrý taýar aınalymynyń ulǵaıýyna yqpal etip, energetıka, kólik jáne basqa salalarda budan da aýqymdy jobalardy júzege asyrý úshin bızneske qosymsha múmkindikter jasaıdy, — dedi Ilham Álıev.
