Kenesary Qaptaǵaev dúnıeden ozdy. Bul týraly Serik Ábdirahmanov feısbýk paraqshasynda jazdy, dep habarlaıdy «Adyrna» ulttyq portaly.
«Ol ultjandy, memleketshil, eliniń naǵyz patrıoty edi. 90-shy jyldardyń basynda Kenesarymen ekeýmiz Almaty qalalyq atqarý komıtetinde Zamanbek Nurqadilovtiń qolastynda qyzmet etken edik. Sol kezde Gorbachev bastaǵan «perestroıka» bytyqy-shytyqyǵa aınalyp, KSRO ydyrap, bıliksizdik jaılap ketken bolatyn. Barlyq jerde demokratııalyq kúshter bas kótergen. Bıliktegiler birese Máskeýden jaltaqtap, birese oıanǵan halyqtan qorqaqtap, ne isterin bilmeı otyrdy. Mine, osyndaı sátte qaısar minezdi Zamanbek-batyr ult qamyn oılap, áleýmettik, ıdeologııa salasyna basshylyq etip júrgen Kenesary Qaptaǵaevtiń bastamalaryna qoldaý jasady, sonyń arqasynda Almatynyń biraz ortalyq kóshelerine qazaqsha ataýlar berildi. Almatydaǵy «jetim burysh» atanǵan qıylysta topyrlaǵandar men páterden páterge kóship júrgen baspanasyzdarǵa Kenesary uıytqy bolyp, birneshe qoǵamdyq uıymdardyń dúnıege kelýine kómegin kórsetti. Bulardyń BAQ arqyly aqylmen júrgizgen túsinikteme áreketteri, alańdarda ótkizgen beıbitshil ereýilderi kópshiliktiń kóńilin ózderine burdy. Buny sebep etip Zamanbek Qalabaıuly qoldanystaǵy jer qatynastaryna baılanysty erejelerge ózgerister engizip, Almaty qalasynda uzaq ýaqyt turyp, baspanasyz júrgenderge úı salý úshin jer telimderi berilsin degen sheshimin shyǵaryp, buny júzege asyratyn memlekettik komıssııanyń basshysy etip meni taǵaıyndady. Kenesary Qaptaǵaev, qoǵamdyq uıymdardyń ókili Jeńis Sabraıymov pen taǵy basqa belsendiler qalalyq atqarý komıtetiniń bólimderimen birigip azamattardyń aryzdaryn qabyldap, egjeı-tegjeıli qujattaryn qarap, usynystaryn maǵan berip otyrdy. Myńdaǵan jer telimderi panasyz qańǵyryp júrgenderdiń ıeligine ótti. «Shańyraq», «Baqaı», «Dýman» taǵy basqa móltek aýdandar paıda boldy, Naýa kóshesiniń boıynda jańa úıler salyndy. Kenesary men Jeńis bastaǵan komanda óz qyzmetterin bıik kásibı deńgeıde, attaryna bir jaman sóz keltirmeı oryndady. Bir de bir narazylyq olar ústine túspedi. Bir jerden shataq shyqpady. Belsendilerdiń biri maǵan kelip ózderine jer suramady. Kenesarynyń adaldyǵy olarǵa úlgi boldy. Men atalǵan jumystardyń basynda 1 jyl ǵana istep, basqa jumysqa aýysyp kettim. Kenesary baspanasyzdardyń múddesi úshin jyldar boıy kúreste boldy. Bizdiń komıssııa shyǵarǵan sheshimderge komıtetiniń hatshysy mór bastyrmaı, sozbalaqqa salǵan kezde ol Zákeńe tikeleı baryp kertartpalardy oryndaryna qoıǵanyn bilemin. «Tek oryssha sóıleıtin radıo, telearnalarmen 15 jyl sottasyp júrip, qazaqshalap shyqtym…», - dep bir suhbatynda aıtqany bar Kenekeńniń. Ult múddesi turǵan jerde ol keri qaıtpaıtyn minezdi jigit edi. Men oǵan aıtatynmyn ákeńe qatty uqsaǵan skensiń dep. Muhamádil aǵamyz soǵysta aıyp batalonyndaǵy barlaýshylar tobyna komandıri bolyp, «Erligi úshin» (Za Otvagý) medalimen úsh ret marapattalǵan. Eki márte Keńes Odaǵynyń Batyry ataǵyna ol kisi usynylyp, juldyzdyń ornyna aıyp batalonynyń jaýyngerine tek medal ǵana bergen. Batyr aǵamyz 1953 týǵan ulyn Kenesary dep ataýy da júreginiń túgi bardy bildirmeı ma… Kenesary ult namysyn qorǵap, ómirin el múddesine arnady, ákesiniń úmitin aqtady. Marqumnyń januıasyna, jaqyndaryna shyn júregimmen kóńil aıtamyn. Kenesary máńgi meniń júregimde!», - dep jazdy Serik Ábdirahmanov.
Aıtalyq, Kenesary Qaptaǵaev «Jeltoqsan kóterilisi» QB teń tóraǵasy, «Ult dabyly» qoǵamdyq qozǵalysynyń jetekshisi boldy.
«Adyrna» ulttyq portaly
