Belgili qalamger Baýyrjan Omaruly grek-rım kúresinen qazaqstandyq jáne burynǵy keńes odaǵynyń palýany, Qazaqstannyń eńbek sińirgen qaıratkeri Dáýlet Turlyhanovty eleýli elý segiz jasymen quttyqtady. Júrek jardy jazbasyn óz Facebook paraqshasynda jarııalady, dep habarlaıdy “Adyrna” ulttyq portaly.
Áıgili balýan. Ardaqty azamat. Maıtalman maman. Álemdik deńgeıdegi kúres sporty qurylymdary basshylarynyń biri. Ataq-dańqy jer jarady. Solaı eken dep, keýde kergenin kórmeppiz. Kórkem minezdi. Kishipeıil. Qaıyrymdy. Sóılese qalsań da, saparlas bolsań da, soǵan kóziń jetedi.
Basqa da ónegeli isteri barshylyq.
Toqsanynshy jyldardyń basynda belgili kásipker Erkin Qalıevpen birlesip jekemenshik aqparat mekemesin ashty.
Tanymal eki jigittiń esimderinen quralǵan "Er-Dáýlet" aqparat agenttiginiń tilshileri álem qulaq túrgen oqıǵalardyń ortasyna baryp, dúnıeniń túkpir-túkpirinen habar taratqany jurtshylyqtyń esinde bolar.
Agenttik ókilderi memleket basshylarynyń resmı saparlaryna da birge attandy. Jan alysyp, jan berisken aıtýly sport saıystarynan tikeleı reportaj berdi.
Alash týy jelbiregen olımpıadalardyń tórinde de "Er-Dáýlettiń" saıypqyran sarbazdary jasyn oınatty. Osynyń bári jekemenshik aqparat quralyn quryp, onyń tizginin belgili de bedeldi jýrnalıst, qaıratker-qalamger Qydyrbek Rysbekovke senip tapsyrǵan Dáýlet balýannyń arqasy edi. Qarshadaıyn taý qoparyp, tas jaryp úırengen Qydyr dos basty sosyn qamshyny... Az jylda agenttiktiń atyn qalyń elge tanytty. "Er-Dáýlet" - óz zamanynda óz mindetin oryndaı bilgen aqparat qurylymy.
Qazaq jyrynyń eren júırigi Murat Móńkeulynyń:
Balýan, baılyq, batyrlyq,
Úsheýi qoldan kelmeı júr, -
degen óleń joldary bar.
Murat aqyn atap kórsetken osy úsh uǵymdy júregimen sezinip, jónimen qadirlegen, qanasynan aspaǵan, kemerinen taspaǵan qarapaıym qazaqtyń biri, elimizdiń parasatty perzenti Dáýlet Turlyhanov búgin elý segiz jasqa toldy.
Týǵan kúnińiz qutty bolsyn, Dáýke! Amandyq tileımiz!
Dáýlet Bolatuly Turlyhanov 1963 jyly 18 qarashada Shyǵys Qazaqstan oblysynyń Jarma aýdanynda dúnıege kelgen. Týrızm jáne sport akademııasyn, ál-Farabı atyndaǵy Qazaq ulttyq ýnıversıtetin bitirgen.
Palýan, grek-rım kúresinen eńbek sińirgen sport sheberi, Qazaqstannyń eńbek sińirgen qaıratkeri, Qazaqstan jáne Qyrǵyzstan Respýblıkalarynyń eńbek sińirgen jattyqtyrýshysy.
Qazaqstannyń jáne halyqaralyq týrnırlerdiń jeńimpazy, KSRO-nyń jeti dúrkin chempıony, KSRO halyqtary spartakıadasynyń kúmis júldegeri, jáne jeńimpazy, Eýropa chempıony, Álem chempıony jáne kúmis júldegeri, qola júldegeri, Álem kýbogynyń eki márte jeńimpazy, 12-shi Azııa oıyndarynyń jeńimpazy, Azııanyń eki dúrkin chempıony, 24-25-shi Olımpıadalyq oıyndarynyń kúmis, qola júldegeri bolǵan.
“Adyrna” ulttyq portalynyń ujymy da týǵan kúnińizben shyn júrekten quttyqtaıdy!
“Adyrna” ulttyq portaly
