Ulytaý oblysynyń Eltańbasy bekitildi. Bul týraly Ulytaý oblysynyń ákimdigi málimdedi, dep habarlaıdy “Adyrna” ulttyq portaly.
“Birneshe aı boıy Ulytaý oblysynyń Eltańbasynyń úzdik eskızdik jobasyna baıqaý ótkeni belgili. Óńirdiń basty rámizine qatysty respýblıkamyzdyń túpkir-túkpirinen 130-ǵa jýyq usynys tústi.
Barlyq eskızder 2022 jylǵy 12-18 jeltoqsan aralyǵynda arnaıy uıymdastyrylǵan kórme aıasynda Jezqazǵan turǵyndary men qonaqtarynyń nazaryna usynyldy. Nátıjesinde komıssııa músheleri jáne kórmege kelgen turǵyndar eń úzdik 18 eskızdi tańdady”,- dep habarlady.
Ulytaý oblysynyń Eltańbasyn tańdaýǵa óńirdiń barlyq turǵyndary da Instagram paraqshasynda tanymal «Eto Jez» paraqshasynda daýys berý arqyly qatysýǵa múmkindik aldy. Onlaın daýys berý nátıjeleri boıynsha eń kóp daýys jınaǵan №15 nusqa bolyp aıqyndaldy.
“Jeńimpaz atanǵan eskızdik joba jerlesimiz, Eýrazııalyq Dızaınerler Odaǵynyń múshesi Shahıbaden Seıitkenovtyń eńbeginiń nátıjesi. Ulytaý oblysynyń Eltańbasy - taýlardyń bir tústi kontýrlyq beınesi. Eltańbanyń tómengi bóliginde - “ŪLYTAU”degen jazý bar.
Túrli-tústi beınede Ulytaý oblysynyń Eltańbasy eki tústi: qońyr jáne kók. Eltańbadaǵy ortalyq oryndy Ulytaý taýlaryn eske túsiretin sýret alady. Alaıda, taýlardyń beınesi tek relefti jańǵyrtý ǵana emes, bul úlken kórkemdik-estetıkalyq obraz; bostandyqtyń sımvoly, bolashaqqa aparatyn jol, rýhanı órleýdiń sımvoly.
Tómengi jaǵynda ornalasqan “ŪLYTAU” jazýy tańbaly tas petroglıfteri stılinde beınelengen. Bul óz kezeginde, bizdiń ólkemizdiń baı tarıhyn, halyqtyń birligi men tutastyǵynyń ǵasyrlar boıǵy dástúrlerin beıneleıdi. Ǵalymdar tańbaly tasty qazaq halqynyń alǵashqy Konstıtýııasy dep ataǵany kezdeısoq emes: munda rý ókilderi tastarǵa petroglıfter oıyp, Máńgilik baýyrlastyqta bolýǵa ant bergen. Osylaısha, turǵyndar tańdaǵan Ulytaý oblysynyń Eltańbasy óńirimizdiń ajyramas ótkenin, búginin jáne bolashaǵyn baılanystyrady”,- dep jazdy ákimdik jelidegi paraqshasyna.
Budan bylaı bul Eltańba Ulytaý oblysynyń aıryqsha belgileriniń biri bolady. Eltańbanyń etalonyn arnaıy komıssııa bekitti, onyń quramyna aımaqtaǵy tanymal ǵalymdar men sýretshiler, tarıhshylar men pedagogtar, qurmetti ardagerler men qoǵam qaıratkerleri endi. Komıssııanyń tóraǵasy qazaqstandyq sýretshi jáne sáýletshi, QR Memlekettik Eltańbasy avtory J.Málibekov boldy.
