Elımız 2017 jylǧa deiın 22 qyrküiek künın Qazaqstan halqynyŋ tılder künı retınde atap öttı. Alaida soŋǧy 5 jyldan berı Ahmet Baitūrsynūlynyŋ tuǧan künıne orai būl merekenı 5 qyrküiek künı atap ötıp jür. Tıl saiasaty komitetı keler jyldan bastap memlekettık qyzmetşılerdıŋ qazaq tılın bıluın mındetteuı mümkın. Al «halyq qalaulylary» degen ataǧy bar Mäjılıs deputattarynyŋ qazaq tılın bıluı kerek pe?
QAZAQ TILIN ÜIRENIP JATYRMYN – SERGEI PONOMAREV
Mäjılıstegı 98 deputtattyŋ ışınde är türlı diaspora ökılderı bar. Solardyŋ ışınde Maksim Rojin sekıldı bırlı-jarym azamat bolmasa, özgelerı qazaq tılınde erkın söilei almaidy. Mysaly belgılı telejurnalist Sergei Ponomarev «Qazaq tılınde qanşalyqty bılesız, jalpy tüsınesız be?» degen sūraqqa «Tört ūlymnyŋ bırı qazaq tılın jaqsy bıledı» dep aqtalǧandai boldy.
Alaida jurnalistıŋ «Sız özıŋız qazaq tılın qanşalyqty bılesız?» degen saualǧa «Qazaq tılın üirenıp jatyrmyn. Bıraq oŋai emes. Qazırgı taŋda Mäjılıstıŋ janynan aşylǧan qazaq tılın üirenu kursyna qatysyp jürmın. Bır jyldan keiın sızdıŋ sūraǧyŋyzǧa qazaq tılınde jauap beremın. Menıŋ oiymşa, är Qazaqstan azamaty qazaq tılın bılu kerek. Menıŋ tört balamnyŋ bırı qazaq tılın jaqsy bıledı. Qalǧany üirenıp jatyr», – dep jauap berdı.
Sergei Ponomarev Qazaqstan täuelsızdık alǧan 1991 jyly 30 jasta bolypty. Qylşyldaǧan jas kezınde qazaq tılın üirenudı qajet dep tappaǧan deputat 60 jastan asqanda memlekettık tıldı meŋgere ala ma? Ümıtten küdık basym.
6 AI NEMESE 1 JYLDA QAZAQ TILIN ÜIRENEMIN – NİKİTA ŞATALOV
Täuelsızdıkten keiın tuǧan Nikita Şatalovtyŋ qazaq tılın bılmegenıne qarasaq Sergei Ponomarevqa ökpe joq eken. 31 jastaǧy Mäjılıs deputaty qazaq tılın üirenıp jürgenın aitady.
"Mäjılıs deputaty etıp halyq sailaǧannan keiın men üşın būl sūraq – basty mäsele. Bıraq bızdıŋ elde qazaq ıldı jäne orystıldı öŋırler bar. Mysaly, ärıptesterım Maksim Rojin, Genadii Şipovskii qazaqtıldı ortada ösken soŋ olar qazaq tılınde erkın söileidı. Men orys tıldı öŋırde ösken soŋ qazır maǧan qazaq tılın üirenu öte maŋyzdy", - dep aǧynan jaryldy ol.
Deputat ortasynda orys tılınde söileitınder köp bolǧanyn, al mektep baǧdarlamasy qazaq tılınde söileitın oquşylarǧa laiyqtalyp jasalǧanyn jetkızdı.
"Mektep baǧdarlamasy dūrys emes boldy. Mektep baǧdarlamasy otbasynda qazaq tılınde söileitın oquşylarǧa arnap jazylǧan. Balalar şet tılın üirengenı sekıldı qazaq tılın de solai üirenuımız kerek edı. Sodan keiın eŋ maŋyzdy dünie özıŋ ösken ortaǧa bailanysty. Eger senıŋ ortaŋda qazaq tılınde söileitın adam bolmasa, onda senıŋ qazaq tılın üirenuıŋ qiyn. Sebebı ainalaŋdaǧy adamdardyŋ bärı orys tılınde söileidı. Men sızge myna uaqytta naqty üirenemın dep aita almaimyn. Bıraq alty ai nemese bır jyldyŋ kölemınde jaqsy söilei alamyn. Mūny men naqty aita alamyn", - dedı deputat.
Serık Joldasbai
«Adyrna» ūlttyq portaly
Ūqsas jaŋalyqtar
