Toqaev Mańǵystaýdaǵy tuy sý tapshylyǵyn qysqa merzimde sheshýdi tapsyrdy

1640
Adyrna.kz Telegram

Prezıdent Qasym-Jomart Toqaev Mańǵystaý oblysy Munaıly aýdany turǵynynyń tuy sý tapshylyǵyna qatysty aryz-shaǵymyna nazar aýdardy, dep habarlaıdy «Adyrna» tilshisi Aqordaǵa silteme jasap.

Memleket basshysy Úkimet pen oblys ákimdigine atalǵan máseleni múmkindiginshe qysqa merzimde sheshýdi tapsyrdy.

«Úkimettiń málimeti boıynsha búginde óńirdegi sý tapshylyǵy – eń ózekti máselelerdiń biri.

Sýdyń jetispeýshiligi táýligine 77 200 tekshe metrdi quraıdy. Aýyzsýdyń tapshylyǵy, ásirese, jaz mezgilinde qatty seziledi.

Munaıly aýdanynda kúrdeli jaǵdaı qalyptasyp otyr. Qazirgi ýaqytta «Kaspıı» sý tushytý zaýytyndaǵy isten shyqqan sorǵy qondyrǵysynyń jóndelip jatqanyna baılanysty aýdandaǵy sý berý mólsheri táýligine 13 myń tekshe metrden 10 myń tekshe metrge deıin azaıǵan.

Aýdan turǵyndary arasynda túsindirý jumystary júrgizilip jatyr.

Máseleni kezeń-kezeńimen sheshý úshin óńirde sý tushytý zaýyttary men qondyrǵylardyń qurylysy júrgizilýde»,—delingen habarlamada.

Halyq sanynyń jyl saıyn ósýine baılanysty «Kaspıı» sý tushytý zaýytynyń qýatyn táýligine 20 myń tekshe metrge arttyrý qajet. Bul aýyzsý berý mólsherin táýligine 40 myń tekshe metrge deıin jetkizýge múmkindik beredi.

Osy maqsatta Úkimet rezervinen 5,6 mıllıard teńge bólý jóninde sheshim qabyldandy.

Munaıly aýdanyn sýmen «Mańǵystaý jylý» MKK qamtamasyz etedi. Aýyzsý tapshylyǵyna baılanysty «Mańǵystaý jylý» MKK halyqqa sýdy qubyr arqyly keste boıynsha jetkizedi. Sonymen qatar sýdy aýdan turǵyndarynyń suranysy boıynsha sý tasıtyn kólikpen ákeledi.

«Kaspıı» sý tushytý zaýytynyń qýatyn táýligine 40 myń tekshe metrge deıin jetkizý jónindegi jobanyń júzege asyrylýy Munaıly aýdanynyń aýyldary men Qaraqııa aýdany Quryq aýylynyń turǵyndaryn sýmen úzdiksiz qamtamasyz etýge jáne sý tapshylyǵyn tolyq joıýǵa múmkindik beredi.

Pikirler