Maŋǧystau oblysynyŋ şarualary quaŋşylyqtan tırı qalǧan malyn saqtap qalu üşın jantalasyp jatyr dep habarlaidy «Evraziia» telearnasy.
Öŋırde jaǧdai şyn mänınde asa qiyn. Tırı qalǧan malǧa jem-şöp joq, su problemasy älı de saqtaluda. Ükımet bölgen 2 mlrd teŋge tükke jetpedı deidı şarualar. Qarajattyŋ jartysy bügınde igerılgen. Bıraq, naqty kömek bolmai jatyr deidı olar.
Jergılıktı tūrǧyn Saǧat Qosovtyŋ aituynşa, jūttan tırı qalǧan maldyŋ özı öludıŋ aldynda tūr. Äbden älsırep, ornynan da tūra almaidy eken. Al, Ükımettıŋ «oblysta 1 myŋnan astam mal qyryldy» degen statistikasy ötırık deidı ol. Bügınde ien dalada aram qatqan jylqylardyŋ ölekslerı älı jatyr.
«Olar ottai beredı. Kemı 5-6 myŋ mal qyryldy», - deidı Saǧat Qosov.
Al, Nūrbolat Temırbaev bolsa keşegı jazda 27 bas jylqysynan aiyrylǧan. Kün qatty ysyǧan kezde onyŋ jinaǧan şöbı tügel örtenıp ketıptı. Satyp alaiyn dese baǧa ūşyp tūr.
«Ükımetten alǧan aqşama nebärı 150 qap jem aldym. Künıge 2 qabyn beremın malǧa. Ai soŋyna deiın ne bolaryn bılmeimın. Qauyn-qarbyz beretın şyǧarmyn», - deidı ol.
Şarualar jazdan aman şyqqan mal aldaǧy qysta tügel qyrylyp qala ma dep qorqady. Öitkenı denesınde maiy joq, özdıgımen astauǧa baryp su ışe almaityn jylqylar qar tüskende üsıp öluı de ǧajap emes.
