Mańǵystaý oblysynyń sharýalary qýańshylyqtan tiri qalǵan malyn saqtap qalý úshin jantalasyp jatyr dep habarlaıdy «Evrazııa» telearnasy.
Óńirde jaǵdaı shyn máninde asa qıyn. Tiri qalǵan malǵa jem-shóp joq, sý problemasy áli de saqtalýda. Úkimet bólgen 2 mlrd teńge túkke jetpedi deıdi sharýalar. Qarajattyń jartysy búginde ıgerilgen. Biraq, naqty kómek bolmaı jatyr deıdi olar.
Jergilikti turǵyn Saǵat Qosovtyń aıtýynsha, juttan tiri qalǵan maldyń ózi ólýdiń aldynda tur. Ábden álsirep, ornynan da tura almaıdy eken. Al, Úkimettiń «oblysta 1 myńnan astam mal qyryldy» degen statıstıkasy ótirik deıdi ol. Búginde ıen dalada aram qatqan jylqylardyń óleksleri áli jatyr.
«Olar ottaı beredi. Kemi 5-6 myń mal qyryldy», - deıdi Saǵat Qosov.
Al, Nurbolat Temirbaev bolsa keshegi jazda 27 bas jylqysynan aıyrylǵan. Kún qatty ysyǵan kezde onyń jınaǵan shóbi túgel órtenip ketipti. Satyp alaıyn dese baǵa ushyp tur.
«Úkimetten alǵan aqshama nebári 150 qap jem aldym. Kúnige 2 qabyn beremin malǵa. Aı sońyna deıin ne bolaryn bilmeımin. Qaýyn-qarbyz beretin shyǵarmyn», - deıdi ol.
Sharýalar jazdan aman shyqqan mal aldaǵy qysta túgel qyrylyp qala ma dep qorqady. Óıtkeni denesinde maıy joq, ózdigimen astaýǵa baryp sý ishe almaıtyn jylqylar qar túskende úsip ólýi de ǵajap emes.
