پرەزيدەنت قاسىم-جومارت توقاەۆ ماڭعىستاۋ وبلىسى مۇنايلى اۋدانى تۇرعىنىنىڭ تۇششى سۋ تاپشىلىعىنا قاتىستى ارىز-شاعىمىنا نازار اۋداردى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
مەملەكەت باسشىسى ۇكىمەت پەن وبلىس اكىمدىگىنە اتالعان ماسەلەنى مۇمكىندىگىنشە قىسقا مەرزىمدە شەشۋدى تاپسىردى.
«ۇكىمەتتىڭ مالىمەتى بويىنشا بۇگىندە وڭىردەگى سۋ تاپشىلىعى – ەڭ وزەكتى ماسەلەلەردىڭ ءبىرى.
سۋدىڭ جەتىسپەۋشىلىگى تاۋلىگىنە 77 200 تەكشە مەتردى قۇرايدى. اۋىزسۋدىڭ تاپشىلىعى، اسىرەسە، جاز مەزگىلىندە قاتتى سەزىلەدى.
مۇنايلى اۋدانىندا كۇردەلى جاعداي قالىپتاسىپ وتىر. قازىرگى ۋاقىتتا «كاسپي» سۋ تۇشىتۋ زاۋىتىنداعى ىستەن شىققان سورعى قوندىرعىسىنىڭ جوندەلىپ جاتقانىنا بايلانىستى اۋدانداعى سۋ بەرۋ مولشەرى تاۋلىگىنە 13 مىڭ تەكشە مەتردەن 10 مىڭ تەكشە مەترگە دەيىن ازايعان.
اۋدان تۇرعىندارى اراسىندا ءتۇسىندىرۋ جۇمىستارى جۇرگىزىلىپ جاتىر.
ماسەلەنى كەزەڭ-كەزەڭىمەن شەشۋ ءۇشىن وڭىردە سۋ تۇشىتۋ زاۋىتتارى مەن قوندىرعىلاردىڭ قۇرىلىسى جۇرگىزىلۋدە»،—دەلىنگەن حابارلامادا.
حالىق سانىنىڭ جىل سايىن وسۋىنە بايلانىستى «كاسپي» سۋ تۇشىتۋ زاۋىتىنىڭ قۋاتىن تاۋلىگىنە 20 مىڭ تەكشە مەترگە ارتتىرۋ قاجەت. بۇل اۋىزسۋ بەرۋ مولشەرىن تاۋلىگىنە 40 مىڭ تەكشە مەترگە دەيىن جەتكىزۋگە مۇمكىندىك بەرەدى.
وسى ماقساتتا ۇكىمەت رەزەرۆىنەن 5,6 ميلليارد تەڭگە ءبولۋ جونىندە شەشىم قابىلداندى.
مۇنايلى اۋدانىن سۋمەن «ماڭعىستاۋ جىلۋ» مكك قامتاماسىز ەتەدى. اۋىزسۋ تاپشىلىعىنا بايلانىستى «ماڭعىستاۋ جىلۋ» مكك حالىققا سۋدى قۇبىر ارقىلى كەستە بويىنشا جەتكىزەدى. سونىمەن قاتار سۋدى اۋدان تۇرعىندارىنىڭ سۇرانىسى بويىنشا سۋ تاسيتىن كولىكپەن اكەلەدى.
«كاسپي» سۋ تۇشىتۋ زاۋىتىنىڭ قۋاتىن تاۋلىگىنە 40 مىڭ تەكشە مەترگە دەيىن جەتكىزۋ جونىندەگى جوبانىڭ جۇزەگە اسىرىلۋى مۇنايلى اۋدانىنىڭ اۋىلدارى مەن قاراقيا اۋدانى قۇرىق اۋىلىنىڭ تۇرعىندارىن سۋمەن ۇزدىكسىز قامتاماسىز ەتۋگە جانە سۋ تاپشىلىعىن تولىق جويۋعا مۇمكىندىك بەرەدى.
