Ūlytau oblysynyŋ äkımı Berık Äbdıǧaliūly bır kezdegı ūsynystarynda äzırge özgerıs joq ekenın aitty, dep habarlaidy "Adyrna". Būl turaly ulysmedia.kz jazdy.
Bügın Astanada Ortalyq kommunikasiialar qyzmetı alaŋynda ötken brifingte Berık Äbdıǧaliūly Ūlytau oblysynyŋ äleumettık-ekonomikalyq damuy turaly baiandaǧan.
Ol osydan bırneşe ai būryn bırqatar oblystardyŋ atauyn özgertu jönınde ūsynys aitqan. Brifing soŋynda jurnalister sūraǧyna jauap bere kele ol osy mäselede būǧan deiıngı pıkırı özgermegenın, alaida aitqandary ūsynys küiınde qalǧanyn habardar ettı.
"Men - "Qazaq tılı" respublikalyq qoǧamynyŋ jetekşısımın. Ǧylymi konferensiialardyŋ bırınde men öz közqarasymdy bıldırdım. Būl - menıŋ jeke közqarasym. Osy turaly būryn qoǧamdyq jobalarymda aitqan bolatynmyn. Būl menıŋ ūsynysym bolyp qala berdı", - dedı ol.
Esterıŋızge sala keteiık, 2023 jyldyŋ 28 aqpanda Berık Äbdıǧaliūly "Ūlytau oblysynyŋ ruhani damuy" respublikalyq ǧylymi-praktikalyq konferensiiasynda Qazaqstannyŋ bırneşe öŋırınıŋ atauyn özgertudı ūsyndy. Şeneunık Batys Qazaqstan oblysyn - Aqjaiyq, Şyǧys Qazaqstan oblysyn - Altai, Soltüstık Qazaqstan oblysyn - Qyzyljar, Pavlodar oblysyn Baianauyl dep özgertu kerektıgın aitty. Onyŋ pıkırınşe, būl eldıŋ barlyq tūrǧyndaryn şabyttandyrady.
Būǧan deiın qazaqstandyq diplomat - Qazaqstannyŋ Mysyrdaǧy elşısı Qairat Lama Şarif Facebook-paraqşasynda KSRO kezınen qalǧan bırqatar qala men oblys ataularynan aryludy jäne memleketı atauyna qatysty öz paiymyn ūsynǧan bolatyn. Keiınnen Prezident elşıge sögıs jariialady. Artynşa jazba öşırıldı.
Odan da qyzyǧy elşı jazbalarynan köp ūzamai qūrylǧan jaŋa oblystardyŋ atauy Lama Şarif ūsynysymen säikes kelgen. Abai, Jetısu jäne Ūlytau ataulary alǧaş Qairat Lama Şariftıŋ jazbalarynda atalǧan bolatyn.
Al elşınıŋ memlekettık qyzmetkerlerdıŋ ädep kodeksınıŋ 9-tarmaǧynyŋ talaptaryn saqtamaǧany üşın sögıs alǧany aitylǧan.
Ädep kodeksınıŋ "Memlekettık qyzmetşılerdıŋ qyzmettık ädebınıŋ standarttary" degen 3-tarauy 9-tarmaǧynda bylai delıngen: "Memlekettık qyzmetşıler memlekettık saiasat jäne qyzmettık jūmys mäselelerı jönındegı öz pıkırın, eger ol memlekettık saiasattyŋ negızgı baǧyttaryna säikes kelmese, jariialauǧa rūqsat etılmegen qyzmettık aqparatty aşatyn bolsa jäne memlekettıŋ lauazymdy adamdarynyŋ, memlekettık basqaru organdarynyŋ, basqa da memlekettık qyzmetşılerdıŋ atyna ädepsız sözderdı qamtityn bolsa, köpşılık aldynda bıldırmeuge tiıs".
Ūqsas jaŋalyqtar
