Elordada Qazaqstan Respublikasynyŋ jastar arasyndaǧy paravelosport chempionaty men velosporttan Qazaqstan Respublikasy Gimnaziadasynyŋ jabylu jäne jeŋımpazdardy marapattau räsımı öttı. Būl doda elımızdıŋ tükpır-tükpırınen kelgen jas sportşylardyŋ basyn qosyp, olardyŋ sporttaǧy äleuetın körsetuge mümkındık berdı.
Bırneşe künge sozylǧan jarys barysynda qatysuşylar özderınıŋ tözımdılıgı men şeberlıgın ǧana emes, jeŋıske degen jıgerı men qaisarlyǧyn da däleldei bıldı. Al jabylu saltanaty sportşylar, jattyqtyruşylar jäne ata-analar üşın erekşe äserlı sätterge toly boldy.
Jarystyŋ jabylu räsımınde ūiymdastyruşysy Mäjılıs deputaty Seitjan Kenjeǧūl qatysuşylardy marapattap, jeŋımpazdarǧa arnaiy syilyqtar men medaldar tabystady. Sonymen qatar, şaraǧa qonaq retınde Mäjılıs deputattary İslam Erkınūly men Ekaterina Sergeevna, Qazaqstan Respublikasy Turizm jäne sport ministrlıgı Sport komitetıne qarasty mümkındıgı şekteulı azamattarǧa arnalǧan sporttyq daiarlau ortalyǧynyŋ direktory Bolatbek Asylbekov, sport ortalyǧynyŋ direktory Taşnetov Arman jäne «Samūryq» qoldau qorynyŋ direktory Älfiia Däuletqaliqyzy qatysyp, üzdık sportşylardy marapattau räsımıne atsalysty.
Marapattau sätınde ata-analardyŋ quanyşy erekşe baiqaldy. Olar balalarynyŋ jetıstıkterıne maqtanyp, är jeŋıstı bırge bölıstı. Būl tek sporttyq nätije ǧana emes, ülken eŋbek pen qoldaudyŋ jemısı ekenı anyq sezıldı.
Qazaqstan paravelosportynyŋ bas bapkerı Nikolai Vasilevich jas sportşylarǧa arnaǧan sözınde jastarǧa erekşe senım artatynyn jetkızdı.
– Men barşaŋyzǧa, äsırese jastarǧa sättılık tıleimın. Bız barlyq sportşylardy baqylap otyramyz, eşkım nazardan tys qalmaidy. Ärqaisysyna köŋıl bölınedı, är sportşy öz mümkındıgın körsetuge mümkındık alady. Al üzdıkter ūlttyq qūrama sapyna ötıp, jalaqy men syiaqy alyp, käsıbi deŋgeide damuǧa jol aşady. Eŋ bastysy – eŋbek etu, jattyǧudy toqtatpau, – dedı ol.
Bügınde paravelosport tek jarys alaŋy ǧana emes, köptegen jas üşın jaŋa mümkındıkke ainalyp otyr. Osyndai chempionattar arqyly jastar öz küşıne senudı üirenıp, ülken sportqa joldama alady. Eŋ maŋyzdysy — būl jarystar inkliuzivtı qoǧam qalyptastyruǧa jäne erekşe sportşylarǧa jaŋa belesterdı baǧyndyruǧa mümkındık beredı.
Būl chempionat taǧy bır maŋyzdy dünienı körsettı: sport tek medal üşın emes, mümkındıkterdı keŋeitu, senım qalyptastyru jäne är sportşyǧa öz äleuetın körsetu üşın qajet. Jas sportşylardyŋ bügıngı talpynysy — erteŋgı ülken jeŋısterdıŋ bastauy.
