Soltústik Qazaqstan oblysynyń orta mektepterinde oqıtyn bastaýysh synyp oqýshylaryn tegin ystyq tamaqpen qamtý máselesi sheshilip jatqany habarlandy. Qazirgi ýaqytta arnaıy qujat toltyrylyp, qoǵamnyń talqylaýyna usynyldy, dep habarlaıdy "Adyrna" ulttyq portaly.
«SQO memlekettik orta bilim berý uıymdarynda bastaýysh synyp oqýshylaryn tegin ystyq tamaqpen qamtamasyz etý týraly» qaýly jobasy Ashyq normatıvtik quqyqtyq aktiler portalynda jarııalandy. 19 maýsym kúni jaryqqa shyqqan qujat 3 shildege deıin talqylanbaq. Qaýlyǵa óńir basshysy Aıdarbek Saparov qol qoıǵan.
Mundaı sheshim Qazaqstan zańnamasynyń aıasynda jáne Qazaqstan Respýblıkasy Prezıdentiniń baǵdarlamasyna saı qabyldanǵan.
SQO bilim basqarmasynyń málimetinshe, ótken oqý jylynda óńirdegi 465 bilim ordasynda 72 myńnan astam oqýshy bolsa, onyń 31 180-i – bastaýysh synypta oqydy. Bul mektepterdiń 98% - 439-ynda ystyq tamaq uıymdastyryldy. 2% - 11 mektepte býfet jumys istedi. Qyzyljarda ystyq tamaq 550 teńge tursa, aýdandarda túski as 500 teńge boldy.
"Adyrna" ulttyq portaly
