سولتۇستىك قازاقستان وبلىسىنىڭ ورتا مەكتەپتەرىندە وقيتىن باستاۋىش سىنىپ وقۋشىلارىن تەگىن ىستىق تاماقپەن قامتۋ ماسەلەسى شەشىلىپ جاتقانى حابارلاندى. قازىرگى ۋاقىتتا ارنايى قۇجات تولتىرىلىپ، قوعامنىڭ تالقىلاۋىنا ۇسىنىلدى، دەپ حابارلايدى "ادىرنا" ۇلتتىق پورتالى.
«سقو مەملەكەتتىك ورتا ءبىلىم بەرۋ ۇيىمدارىندا باستاۋىش سىنىپ وقۋشىلارىن تەگىن ىستىق تاماقپەن قامتاماسىز ەتۋ تۋرالى» قاۋلى جوباسى اشىق نورماتيۆتىك قۇقىقتىق اكتىلەر پورتالىندا جاريالاندى. 19 ماۋسىم كۇنى جارىققا شىققان قۇجات 3 شىلدەگە دەيىن تالقىلانباق. قاۋلىعا ءوڭىر باسشىسى ايداربەك ساپاروۆ قول قويعان.
مۇنداي شەشىم قازاقستان زاڭناماسىنىڭ اياسىندا جانە قازاقستان رەسپۋبليكاسى پرەزيدەنتىنىڭ باعدارلاماسىنا ساي قابىلدانعان.
سقو ءبىلىم باسقارماسىنىڭ مالىمەتىنشە، وتكەن وقۋ جىلىندا وڭىردەگى 465 ءبىلىم ورداسىندا 72 مىڭنان استام وقۋشى بولسا، ونىڭ 31 180-ءى – باستاۋىش سىنىپتا وقىدى. بۇل مەكتەپتەردىڭ 98% - 439-ىندا ىستىق تاماق ۇيىمداستىرىلدى. 2% - 11 مەكتەپتە بۋفەت جۇمىس ىستەدى. قىزىلجاردا ىستىق تاماق 550 تەڭگە تۇرسا، اۋدانداردا تۇسكى اس 500 تەڭگە بولدى.
"ادىرنا" ۇلتتىق پورتالى
