Qazaqstan Respýblıkasynyń Memlekettik keńesshisi Erlan Qarın jýrnalıst, Májilis depýtaty Nartaı Aralbaıulynyń ıýtýb-arnasyna suhbat berip, elimizdegi birqatar máselelerdi sóz etti. Sonyń ishinde jastar arasynda sıntetıkalyq esirtki qoldanysynyń beleń alýy men nashaqorlyq syndy problemaǵa qatysty óziniń saıası kózqarasyn bildirdi, dep habarlaıdy "Adyrna" ulttyq portaly.
Suhbat barysynda Erlan Tynymbaıuly sıntetıkalyq esirtkiniń zııanyn aıtyp, "Jastar keńesiniń" maqsat-mindetterine toqtaldy.
- Bul qazirgi zamandaǵy eń qaýipti qaterleriniń biri. Sıntetıkalyq esirtki bizdiń qoǵamda ǵana emes, kóptegen elderde jastardy ýlap jatyr. Sondyqtan Prezıdent ótken jylǵy joldaýynda sıntetıkalyq esirtkimen kúresti memlekettiń basty maqsattarynyń biri dep belgiledi. Quzyrly organdardyń jumysyna qaramastan sıntetıkalyq esirtki jyldan-jylǵa keńinen taralyp bara jatyr. Onyń qaýiptiligi nede? Jastardy, ásirese balalardy da ózine tartady. Mektep jasyndaǵy balalardyń da mundaı esirtkini qabyldaǵan jaǵdaılary kezdesip jatady. Ony biraq esirtki dep qabyldamaıdy, dári-dármektiń bir formasy sııaqty túsinedi... Ony kóbi kúsh-qýat beretin dári-dármek sekildi qabyldaıdy. Qalaı dep atasaq ta, bul - ýly, zııandy esirtki, - dedi Erlan Qarın.
Sonymen qatar ol zııandy ádetterge bastaıtyn ónimdermen kúresýge Qasym-Jomart Toqaevtyń memleket deńgeıinde mańyz tanytyp otyrǵanyn aıtyp ótti. Elimizde osy ýaqytqa deıin esirtkimen kúresýge baǵyttalǵan naqty jospardyń qolǵa alynbaı kelgenin tilge tıek etti.
- Árıne, jumystar atqarylyp jatyr. Biraq barlyq memlekettik organdardy jumyldyratyndaı keshendi jospar sońǵy ret 2016 jyly qabyldanǵan bolatyn. Sondyqtan memleket basshysy bizge esirtki bıznesimen kúresti júıeleıtin jospar qurýǵa qatysty tapsyrma berildi. Sonyń negizinde "Jastar keńesi" quryldy. Mınıstrlik ókilderin jınap, "Jastar keńesiniń" alańynynda osy taqyrypty alǵash ret kóterdik. Keshendi jospardyń daıyndalýyn qadaǵalaýǵa aldyq, - dedi saıasatker.
Munymen qosa, Qazaqstan Respýblıkasynyń Memlekettik keńesshisi Erlan Qarın "Jastar keńesiniń" jumysy qalaı júrip jatqanyn sóz etti. Sıntetıkalyq esirtki men nashaqorlyqqa qarsy qurylǵan keshendi jospardyń saıası tetikteri men qoǵamdyq mán-mańyzyn talqylady.
"Adyrna" ulttyq portaly
