Depýtat Qazybek Isa jýrnalıst Dýman Muhametkárimniń qaıta qamalýyna qatysty pikir bildirdi, dep habarlaıdy "Adyrna". Bul týraly depýtat óziniń áleýmettik jelidegi paraqshasynda jazdy.
“Jýrnalıst Dýman Muhametkárim bir jerdi qıratyp, bireýge zaqym keltiripti degendi estigen joqpyz. Qoǵamǵa odan qandaı qaýip bar? Endi qart áke-sheshesin osyndaı qapyryq ystyqta ashtyq jarııalatatyndaı májbúrlikke túsirý qııanat emes pe?!. Dýmandy bir aıdyń ishinde úsh ret tutqyndaý, qamaýdan shyǵa salǵan kúnniń erteńine dúkenge barǵan jerden kósheden ustap alyp, basyp alyp ketý qanshalyqty zańdy? Bul “shash al dese bas alýǵa” daıyn turatyn polıııanyń basynýy emes pe?!”, – dep jazdy májilismen.
Qazybek Isa sóz bostandyǵyn shekteý bas bostandyǵyn shekteýge jalǵasyp kete berýi jaqsylyq emestigin aıtty. Depýtat Ishki ister mınıstrligin jurttyń talabyn eskerip, jýrnalıstiń isine ádil qaraýǵa shaqyrdy.
Eske salaıyq, Dýman Muhametkárim 20 naýryzda Facebook jelisinde jazba jarııalap, 21 naýryz kúni tústen keıin alańǵa shyǵatynyn málimdep, ózgelerdi de oǵan qosylýǵa shaqyrǵany úshin qamaýǵa alyndy. Qamaýda otyrǵanda jýrnalıst ashtyq jarııalady.
15 sáýirde ol qamaýdan bosatylyp, halyqty taǵy da mıtıngke shaqyratynyn málimdedi.
2 mamyrda taǵy 25 táýlikke qamaýǵa alyndy.
Budan buryn advokat Ǵalym Nurpeıisov Áblıazovpen suhbaty úshin jýrnalıst jaýapqa tartylýy múmkin ekenin aıtqan.
26 mamyrda bosap shyqqan Dýman Muhametkárim 28 mamyrda qaıta qamaýǵa alyndy. Onyń ústinen QR QK 405-baby ("ekstremıstik uıymnyń qyzmetine qatysý jáne uıymdastyrý") boıynsha qylmystyq is qozǵalýy múmkin.
2 maýsymda jýrnalıstiń tergeý ızolıatorynda taǵy da ashtyq jarııalaǵany belgili boldy.
Kóp uzamaı onyń ákesi ákesi Almaz Tilepov te as-sýdan bas tartatynyn málimdedi. Ile aýdandyq prokýratýrasyna barǵan Dýman Muhametkárimniń ata-anasy uldarynyń zańsyz ustalyp otyrǵanyn, densaýlyǵy nasharlaǵanyn aıtyp, ony bosatýdy talap etti.
