Búgin QR Parlament Májilisiniń jalpy otyrysynda 2024-2026 jyldarǵa arnalǵan respýblıkalyq bıýdjet týraly Qazaqstan Respýblıkasy zańynyń jobasy qaraldy.
Májilis depýtaty Qazybek Isa QR Kólik mınıstri Marat Qarabaevqa bıýdjetten mıllıardttar bólingen «Túrkistan qalasynyń Shyǵys aınalma jolynyń qurylysy» jobasy nege oryndalmaǵany týraly surady.
Qazybek Isa Kólik mınıstri Marat Kárimjanulyna saýalyn qoıdy.
“Bıýdjet - halyq qazynasy, sondyqtan onyń ár teńgesi oryndy jumsalyp, durys ıgerilýi tıis. “Aq jol” frakııasy buǵan deıin bir aı buryn «Jol salasyndaǵy jolǵa qoıylǵan jemqorlyq» atty depýtattyq saýalymyzda elimiz úshin asa mańyzdy joldardyń qanshama jyldardan beri bitpeı jatqanyn ótkir synaǵan edik. Al joǵary aýdıtorlyq palata da óz qorytyndysynda qarjylandyrý bola tura, jol salý jónindegi jobalardyń iske asyrylý merzimderi keshiktiriletini jáne birneshe ret aýystyrylatyny jóninde atap ótti. Buǵan aıqyn mysal retinde «Túrkistan qalasynyń Shyǵys aınalma jolynyń qurylysy» jobasyn aıtýǵa bolady.
Jobany iske asyrý týraly sheshim 2020 jyly qabyldandy jáne oǵan 2022 jyly bıýdjetten 4,4 mlrd. teńge bólinip, ol tolyq kólemde ıgerilmedi. 2023 jyly taǵy da bıýdjetke 5 mlrd. teńge kóleminde qarajat engizildi, biraq ol da paıdalanylmaı qaldy.
Iaǵnı, 10 mlrd-qa jýyq teńge ıgerilmeı qalǵan. Al basqa qanshama mańyzdy jobalarǵa aqsha jetpeı jatyr. Sonda ıgere almasańyzdar, isteı almasańyzdar jyl saıyn ol mıllıardtardy nesine bıýdjetten bóldirip jatsyzdar?!”, dedi depýtat.
Sondaı-aq, Qazybek Isa qarjylar bólinerde buǵan qyzmeti óte qymbat saraptama jáne jobalaý-smetalyq qujattamaǵa mıllıondaǵan qarajat jumsalatynyn, alaıda bul qujattardyń búgingi kúnge eskirgendikten, olarǵa kezinde jumsalǵan mıllıondar dalaǵa ketkeni anyq ekenin aıtyp, birneshe saýal joldady:
1. Nelikten bul joba oryndalmaı qaldy?
2. Smetalyq qujattamany daıyndaýǵa qansha shyǵyn ketti?
3. Sizdiń mınıstrliktegi laýazymdy adamdardan jaýapkershilikke tartylyp, jaza qoldanylǵandar bar ma? Joq, sizderde mıllıardtardyń ıgerilmeı qala berýi kúndelikti ádettegi jaǵdaı ma?
Al Kólik mınıstri Marat Qarabaev aınalma jol jobalyq-smetalyq qujattaryna 2020 jyly Túrkistan oblysy bıýdjeti esebinen 67 mln. teńge jáne 29 mlrd. teńge quraıtyn 30 shaqyrymdy, 4 jolaqty joldy qurý boıynsha joba ázirlengenin aıtta ketti.
“2022 jyldan bastap oblystyń óz bıýdjeti jetpegen soń Mınıstrlikke berildi. Osyǵan Respýblıkalyq bıýdjetten aqsha bólinbedi, biraq Dúnıejúzilik Banki qarjylandyryp jatqan Almaty-Qorǵas jobasynan únemdelgen qarajat esibinen 2,9 mlrd. teńge 2022 jylǵa, 5 mlrd. teńge qosymsha 2023 jylǵa bólindi.
Dúnıejúzilik Banki óz esebinen konkýrs jarııalady jáne konkýrsqa qatysqan áleýetti merdiger kompanııalar jobany 29 mlrd. teńge emes, odan kóp, ıaǵnı 30 mlrd. teńgeden kóp qarjyǵa iske asyrý týraly usynys berdi. Nátıjesinde jarııalanǵan konkýrs ótpedi dep tabyldy da, merdiger jeńizpaz kompanııa aıqyndalmady.
Bólingen, qarajatty tıimdi ıgerý maqsatynda ol qarjy qazir júrip jatqan Balqash-Býrylbaıtal jobasyna bólindi jáne ol joba bıyl 120 shaqyrym tolyǵymen iske qosyldy”, dedi mınıstr.
Odan bólek, ol Túrkistan aınalma jolyna bıyl joba qaıta qarastyrylatynyn jáne onyń qarjylandyrý kózderi aıqyndalyp, kelesi jylǵa 14 mlrd. teńge qarjy tartylatynyn atap ótti.
