دەپۋتات قازىبەك يسا جۋرناليست دۋمان مۇحامەتكارىمنىڭ قايتا قامالۋىنا قاتىستى پىكىر ءبىلدىردى، دەپ حابارلايدى "ادىرنا". بۇل تۋرالى دەپۋتات ءوزىنىڭ الەۋمەتتىك جەلىدەگى پاراقشاسىندا جازدى.
“جۋرناليست دۋمان مۇحامەتكارىم ءبىر جەردى قيراتىپ، بىرەۋگە زاقىم كەلتىرىپتى دەگەندى ەستىگەن جوقپىز. قوعامعا ودان قانداي قاۋىپ بار؟ ەندى قارت اكە-شەشەسىن وسىنداي قاپىرىق ىستىقتا اشتىق جاريالاتاتىنداي ماجبۇرلىككە ءتۇسىرۋ قيانات ەمەس پە؟!. دۋماندى ءبىر ايدىڭ ىشىندە ءۇش رەت تۇتقىنداۋ، قاماۋدان شىعا سالعان كۇننىڭ ەرتەڭىنە دۇكەنگە بارعان جەردەن كوشەدەن ۇستاپ الىپ، باسىپ الىپ كەتۋ قانشالىقتى زاڭدى؟ بۇل “شاش ال دەسە باس الۋعا” دايىن تۇراتىن پوليتسيانىڭ باسىنۋى ەمەس پە؟!”، – دەپ جازدى ماجىلىسمەن.
قازىبەك يسا ءسوز بوستاندىعىن شەكتەۋ باس بوستاندىعىن شەكتەۋگە جالعاسىپ كەتە بەرۋى جاقسىلىق ەمەستىگىن ايتتى. دەپۋتات ىشكى ىستەر مينيسترلىگىن جۇرتتىڭ تالابىن ەسكەرىپ، ءجۋرناليستىڭ ىسىنە ءادىل قاراۋعا شاقىردى.
ەسكە سالايىق، دۋمان مۇحامەتكارىم 20 ناۋرىزدا Facebook جەلىسىندە جازبا جاريالاپ، 21 ناۋرىز كۇنى تۇستەن كەيىن الاڭعا شىعاتىنىن مالىمدەپ، وزگەلەردى دە وعان قوسىلۋعا شاقىرعانى ءۇشىن قاماۋعا الىندى. قاماۋدا وتىرعاندا جۋرناليست اشتىق جاريالادى.
15 ساۋىردە ول قاماۋدان بوساتىلىپ، حالىقتى تاعى دا ميتينگكە شاقىراتىنىن مالىمدەدى.
2 مامىردا تاعى 25 تاۋلىككە قاماۋعا الىندى.
بۇدان بۇرىن ادۆوكات عالىم نۇرپەيىسوۆ ابليازوۆپەن سۇحباتى ءۇشىن جۋرناليست جاۋاپقا تارتىلۋى مۇمكىن ەكەنىن ايتقان.
26 مامىردا بوساپ شىققان دۋمان مۇحامەتكارىم 28 مامىردا قايتا قاماۋعا الىندى. ونىڭ ۇستىنەن قر قك 405-بابى ("ەكسترەميستىك ۇيىمنىڭ قىزمەتىنە قاتىسۋ جانە ۇيىمداستىرۋ") بويىنشا قىلمىستىق ءىس قوزعالۋى مۇمكىن.
2 ماۋسىمدا ءجۋرناليستىڭ تەرگەۋ يزولياتورىندا تاعى دا اشتىق جاريالاعانى بەلگىلى بولدى.
كوپ ۇزاماي ونىڭ اكەسى اكەسى الماز تىلەپوۆ تە اس-سۋدان باس تارتاتىنىن مالىمدەدى. ىلە اۋداندىق پروكۋراتۋراسىنا بارعان دۋمان مۇحامەتكارىمنىڭ اتا-اناسى ۇلدارىنىڭ زاڭسىز ۇستالىپ وتىرعانىن، دەنساۋلىعى ناشارلاعانىن ايتىپ، ونى بوساتۋدى تالاپ ەتتى.
