Almaty oblysy ákimdigi jolsyz jerlermen qatynaý úshin TANK markaly lıýkstik jol talǵamaıtyn kólikterdi memlekettik satyp alý arqyly ıelengenin málimdedi, dep habarlaıdy “Adyrna” ulttyq portaly Kursiv-ke siltep.
Bul kólikter oblys ákimi Marat Sultanǵazıevtiń qyzmettik saparlaryna paıdalanylmaq.
Jýrnalıst Ashat Nııazov Almaty oblysy ákimdiginiń ashyq avtoturaǵynan birneshe TANK kóligin, sondaı-aq jeke esik janynan Toyota Land Cruiser 300 kóligin baıqaǵan. Ákimdik atalǵan kólikter oblys ákiminiń jumys saparlaryna arnalǵanyn rastady. Olar qıyndyǵy joǵary jolsyz aımaqtarmen jáne uzaq baǵyttarmen júrýge arnalǵan. Alaıda Toyota Land Cruiser 300 kóliginiń naqty kimge tıesili ekeni jaıly aqparat berilmedi.
“Avtokólikter “Memlekettik satyp alý týraly” zań aıasynda ashyq konkýrs arqyly satyp alyndy. Bul – satyp alý rásiminiń ashyqtyǵyn jáne básekelestigin qamtamasyz etti”, – dedi ákim apparaty basshysynyń orynbasary Ernat Baıǵalyq.
Memlekettik satyp alý portalyndaǵy málimetke sáıkes, ákimdik 2023 jyly eń iri avtodıler sanalatyn Allur kompanııasynan jalpy somasy 562 mıllıon teńgege avtokólikter satyp alǵan. Sonymen qatar, oblys ákiminiń negizgi qyzmettik kóligi – Kia K900 ekeni naqtylandy.
Aıta keteıik, ákimdik ǵımaratynyń kúzetshisi jýrnalıstke Toyota Land Cruiser 300 kóligimen ákimniń ózi kelgenin aıtqan. Alaıda bul qymbat kóliktiń kimge tıesili ekeni ázirge belgisiz. Resmı dılerlerdiń málimetinshe, atalǵan kóliktiń quny 47 690 000 teńgeden bastalyp, 69 490 000 teńgege deıin jetedi.
Buǵan deıin de birneshe óńir ákimi qymbat kólik satyp alýy arqyly qoǵamnyń synyna ushyraǵan bolatyn.
