Qazaqstan azamattyǵyn alatyndar qazaq tilinen emtıhan tapsyrady - Premer-mınıstr

6059

Qazaqstan azamattyǵyn alatyndar memlekettik til bilýden emtıhan tapsyrady. Bul týraly QR Premer-Mınıstri Álıhan Smaıylov málimdedi, dep jazady "Adyrna" ulttyq portaly.

Inform.kz habarlaýynsha, búgin Senattyń jalpy otyrysynan keıin ótken baspasóz máslıhatynda tilshiler Úkimet basshysynan memlekettik tildi bilmeıtinderge Qazaqstan azamattyǵyn bermeıtin zań qabyldaý múmkindigine qatysty suraq qoıdy. Osy oraıda bul baǵyttaǵy jumystar qalaı júrgiziletinin suraldy.

«Tıisti zańnamaǵa ózgerister qaralyp jatyr. Osy normalar Úkimette kelisý satysynan ótýde. Jalpy, bul normalardy qoldaımyz. Sondyqtan osyndaı ózgeristerdi zańnamaǵa engizý kerek dep sanaımyz», - dedi Á. Smaıylov.

Bul turǵyda ol atalǵan ózgerister halyqaralyq tájirıbege súıenip daıyndalǵanyn atap ótti.

«Kóptegen elde azamattyq alý úshin memlekettik tildi jáne sol eldiń tarıhyn bilý kerek, sondaı-aq tıisti emtıhan tapsyrý mindetteledi. Germanııada, Túrkııada, Kanadada, Reseıde jáne basqa da memleketterde osyndaı talaptar bar. Ol talaptar aıasynda azamattyq alatyn adamdar sol qoǵamǵa tez beıimdelip ketýine yqpal etedi. Sondyqtan tıisti emtıhan tapsyrý kerek dep oılaımyz, ıaǵnı azamattyq alatyndar bul talaptarǵa saı bolýy qajet», - dedi Premer-Mınıstr.

Sonymen qatar Úkimet basshysy keıbir sanattarǵa bul talaptar qoldanylmaýy múmkin ekenin jetkizdi.

«Etnıkalyq qazaqtarǵa jáne kámeletke tolmaǵandarǵa, sondaı-aq halyqaralyq sharttarǵa sáıkes jeńildetilgen tártippen azamattyq alatyn adamdarǵa atalǵan talaptar qoldanylmaıdy. Osy oraıda Qazaqstanda jaqyn týystary tursa nemese jubaıy Qazaqstan azamaty bolsa, sondaı-aq elimizge eńbegi sińgen adam bolsa, onda tıisti sheshimmen jeńildetilgen túrde osy adamdar azamattyq ala alady», - dedi Álıhan Smaıylov.

Onyń sózine qaraǵanda, Úkimettegi kelisý satysynan ótkennen keıin, bul qujat jaqyn arada Parlamenttiń qaraýyna túsedi. Budan buryn habarlanǵandaı, memlekettik tildi bilmeıtinderge Qazaqstan azamattyǵyn bermeıtin zań qabyldanady.

"Adyrna" ulttyq portaly 

 

 

Pikirler
Uqsas jańalyqtar