Senat tóraǵasy Máýlen Áshimbaev Kaırdegi Sultan Beıbarys meshitiniń ashylýyna qatysyp, Prezıdent quttyqtaýyn jetkizdi, dep habarlaıdy "Adyrna" portaly.
Memleket basshysy óz quttyqtaýynda uly babamyz erjúrektigimen birge órkenıettiń órisin keńeıtý jolynda da óshpes iz qaldyrǵanyn jetkizdi.
"Qazaqstan Prezıdenti Qasym-Jomart Kemeluly Toqaev Beıbarys sultannyń 800 jyldyǵyna arnalǵan is-sharalarǵa qatysýshylarǵa óziniń jyly lebizin joldady. Memleket basshysy bul mereıtoıdy joǵary deńgeıde atap ótýge basa mán berip otyr. Mereıli data aıasynda 600-den astam is-shara uıymdastyrylady. Búgin kúrdeli jóndeýden keıin qaıta ashylyp otyrǵan «Sultan Az-Zahır Beıbarys» meshiti Mysyr men Qazaqstan úshin ǵana emes, ıslam álemi úshin de biregeı mádenı mura ekeni anyq", dedi Máýlen Áshimbaev sóılegen sózinde.
Senat Tóraǵasy eki eldiń tyǵyz baılanysyndaǵy mańyzdy baǵyttardyń taǵy biri teologııalyq bilim ekenin tilge tıek etti. Bul rette qazaqstandyq dintanýshylardyń uzaq jyldar boıy Ál-Azhar ýnıversıtetinde bilim alyp, óz biliktilikterin arttyryp kele jatqanyn aıtqan abzal.
Sapar barysynda Máýlen Áshimbaev Mysyr parlamenti senatynyń tóraǵasy Abdel Ýahab Abdel Razekpen de kezdesti. Kezdesýde ol Mysyr Qazaqstannyń ıslam álemindegi mańyzdy jáne senimdi seriktesi ekenine toqtalyp, aldaǵy ýaqytta bizdiń el kópjaqty baılanysty odan ári damytýǵa múddeli ekenin jetkizdi. Senat spıkeri ózara yntymaqtastyqty arttyrý jolynda parlamentaralyq baılanystyń róli mańyzdy ekenin aıtty.
