Qazaqstandyq aralas jekpe-jek faıteri, birde-bir jeńilis tappaǵan sportshy Shavkat Rahmonov Qobda aýdanynyń Qobda aýylynda bolyp, sý tasqynynan zardap shekken turǵyndarmen kezdesip, úı salyp berýge járdemdespek. Bul týraly Aqtóbe oblysy ákiminiń baspasóz qyzmeti málimdedi, dep habarlaıdy “Adyrna” ulttyq portaly.
«Naýryz meıramymen barshańyzdy quttyqtaımyn. Keremet kúnde 24 úıdiń qazyǵy qaǵylyp jatyr. Men de bul bastamaǵa óz úlesimdi qosamyn dep sheshtim. «Apat aıtyp kelmeıdi» deıdi. Synaqtarǵa moıymaı, jeńe bildińizder. Sizderge densaýlyq, baqyt tileımin. Tek alǵa!» - dedi Shavkat Rahmonov.
Aıta keteıik, Aqtóbe oblysynyń Qobda aýdanynda sý tasqynynan zardap shekkender úshin salynatyn úılerdiń qazyǵy qaǵyldy. Jańa úıler Qobda aýylynyń «Jańaqonys» shaǵyn aýdanynda boı kóteredi. Qurylysy bastalǵan 24 úı tótenshe jaǵdaıǵa qarastyrylǵan bıýdjetke salynady. Olar bıylǵy 1 maýsymda paıdalanýǵa beriledi dep josparlanyp otyr.
