Los-Andjeles qalasynda tūratyn qazaqstandyq käsıpqoi boksşy Madiiar Äşkeevtıŋ üiınde ört şyqty, dep habarlaidy "Adyrna" ūlttyq portaly.
37 jastaǧy sportşy oqiǧanyŋ videosyn özınıŋ Instagram paraqşasynda jariialaǧan. Sportşy beinede otbasymen bırge dostaryna qonaqqa barmas būryn üiden küigen iıs şyqqanyn aitady. Garajdy aşqanda üidıŋ bır bölıgı otqa oranǧanyn körgen Äşkeev otbasy müşelerın syrtqa şyǧarǧan.
Qūtqaruşylar oqiǧa ornyna kelgen boida örttı söndırdı. Qazırgı uaqytta Äşkeevtıŋ otbasy uaqytşa dostarynda tūryp jatyr. Bırneşe saǧattan keiın sportşy Instagram arqyly örttıŋ saldaryn körsetıp, eşkım zardap şekpegenın atap öttı.
Aita keteiık, Madiiar Äşkeev Qazaqstan chempionaty men 2014 jylǧy Älemdık boks seriiasynyŋ (WSB) qola jüldegerı. Ol Soltüstık Amerika boks federasiiasynyŋ (NABF) jäne Ūlttyq boks assosiasiiasynyŋ (NBA) chempiondyq ataqtarynyŋ iegerı.
