قازاقستاندىق ارالاس جەكپە-جەك فايتەرى، بىردە-ءبىر جەڭىلىس تاپپاعان سپورتشى شاۆكات راحمونوۆ قوبدا اۋدانىنىڭ قوبدا اۋىلىندا بولىپ، سۋ تاسقىنىنان زارداپ شەككەن تۇرعىندارمەن كەزدەسىپ، ءۇي سالىپ بەرۋگە جاردەمدەسپەك. بۇل تۋرالى اقتوبە وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«ناۋرىز مەيرامىمەن بارشاڭىزدى قۇتتىقتايمىن. كەرەمەت كۇندە 24 ءۇيدىڭ قازىعى قاعىلىپ جاتىر. مەن دە بۇل باستاماعا ءوز ۇلەسىمدى قوسامىن دەپ شەشتىم. «اپات ايتىپ كەلمەيدى» دەيدى. سىناقتارعا مويىماي، جەڭە بىلدىڭىزدەر. سىزدەرگە دەنساۋلىق، باقىت تىلەيمىن. تەك العا!» - دەدى شاۆكات راحمونوۆ.
ايتا كەتەيىك، اقتوبە وبلىسىنىڭ قوبدا اۋدانىندا سۋ تاسقىنىنان زارداپ شەككەندەر ءۇشىن سالىناتىن ۇيلەردىڭ قازىعى قاعىلدى. جاڭا ۇيلەر قوبدا اۋىلىنىڭ «جاڭاقونىس» شاعىن اۋدانىندا بوي كوتەرەدى. قۇرىلىسى باستالعان 24 ءۇي توتەنشە جاعدايعا قاراستىرىلعان بيۋدجەتكە سالىنادى. ولار بيىلعى 1 ماۋسىمدا پايدالانۋعا بەرىلەدى دەپ جوسپارلانىپ وتىر.
