Aqtöbe oblysynda su tasqynynan zardap şekkenderdıŋ materialdyq şyǧynyn esepteitın komissiia qūryldy. Būl turaly oblys äkımı Ashat Şaharov mälımdedı, dep habarlaidy “Adyrna” ūlttyq portaly.
Oblys basşysy tabiǧattyŋ tılsız apattaryna eşkım tosqauyl bola almaitynyn, jauyn-şaşyn jaǧdaidy qiyndatyp jıbergenın aitqan.
"Qazırgı uaqytta aimaqta su şaiǧan joldar, köpırler men ötkelder, su basqan üiler men aulalar bar. Keşe audandarǧa baryp keldım, bügın qalany aiaqtai jürıp qarap şyqtym. Materialdyq şyǧyndy qūrylǧan komissiia anyqtaityn bolady. Tūrǧyndarymyzǧa sabyrlyqtary üşın alǧysymdy bıldıremın. Eşbır adam nazardan tys qalmaidy",- dep atap öttı öŋır basşysy.
Qazırgı uaqytta qala jäne 12 audannyŋ äkımderı, tötenşe jaǧdailar departamentınıŋ qyzmetkerlerı, äskeri qūrylymdar, poliseiler kündız de, tünde de jūmyla jūmys ıstep jatyr, küşeitılgen tärtıpke köşırılgen.
Ashat Şaharov aqtöbelıkterdı sabyrlyqqa şaqyryp, bır-bırıne qoldau körsetuge şaqyrdy.
