5 naýryz – ult kóshbasshysy Álıhan Bókeıhannyń týǵan kúni. Osy bir mańyzdy dataǵa oraılastyryp, Astana qalasyndaǵy Á.Bókeıhan atyndaǵy №76 mektep-lıeıi 3 naýryz kúni «Álıhan Bókeıhan jáne rýhanı serpin» atty halyqaralyq ǵylymı-tájirıbelik konferenııa ótkizdi. Buryn mundaı aýqymdy taqyryp pen joǵary dárejedegi ǵylymı jıyndy tek JOO-lardyń qabyrǵalarynan ǵana kórsek, 76-mektep bul qaǵıdaǵa ózgeris engizip, tyńnan túreń saldy. Mekteptegi muǵalimder men oqýshylardy ǵylymı izdenis jasaýǵa úndep, derek pen dáıekke, tujyrymdarǵa negizdelgen paıym jasaýǵa túrtki bolǵan salmaqty ıdeıa júzege asty.
Shalǵaıdaǵy jáne astanalyq mektepterden uzyn sany 80 ǵylymı maqala kelip túskenin mektep dırektory Botakóz Bolatbekqyzy óz sózinde aıtyp ótti.
«Sharanyń maqsaty – Álıhan Bókeıhannyń qoǵamdyq-saıası qyzmetin jańa tarıhı kózqaras turǵysynan qorytyp, saıasat sahnasyndaǵy batyl qadamdaryn óskeleń urpaqqa keńinen nasıhattaý», dedi ol.
Is-shara ónerpazdardyń ulttyq rýhty silkinter erekshe ánimen bastaldy. Oń jaq tarapta – ata-ájeler qaýymynan jasaqtalǵan hor, sol jaq tarapta – mektep oqýshylarynyń hory, al ortasynda ulttyq aspaptardy shertip, rýhty ánderdi shyrqaǵan ulandar jınalǵan kópshilikke erekshe atmosfera syılady. Orkestr jetekshisi, ári baıanmen súıemeldeýshi – mekteptiń mýzyka pániniń muǵalimi Taǵybaev Jaldybaı Baıǵarauly.
Mektep shańyraǵynda ótken ǵylymı konferenııaǵa S.A.Júsip, N.J.Qalıev, Ó.Sultanuly, T.S.Sháken, U.Sáıdirahman, N.Qońyrbaı, A.Saılaýqyzy, U.Dáleıuly jáne taǵy basqa alashtanýshy ǵalymdar men qoǵam qaıratkerleri qatysyp, sóz aldy. Onlaın baılanys arqyly Álıhan Bókeıhan týraly orys tilinde 9 taraýdan turatyn kitap jazǵan reseılik ǵalym Vıktor Kozodoı baıandama jasap, óz týyndysyn jazý kezinde 2 eldiń 10 qalasynan 12 arhıvtiń qujattaryn negiz etkeni týraly aıtty.
Mektep ustazdarynan Orazhan Ostaeva (tarıh pániniń muǵalimi) «Ulylar mekenine saıahat» atty baıandama jasap, Álıhannyń týǵan óńirine oqýshylaryn aparý barysy týraly, shákirtteriniń kórgeni men túıgeni týraly tájirıbesimen bólisti. Al qazaq tili men ádebıeti pániniń muǵalimi Gúlmıra Qaljataıqyzy «Álıhannyń qanatty sózderiniń ómirsheńdigi» atty baıandamasynda ult kóseminiń eń áserli, eń ózekti naqyl sózderine basa toqtaldy. Sondaı-aq Ysqaqov Meırambek myrza óz sózinde «Abaı joly» roman-epopeıasyndaǵy tóre urpaǵy Ázimqannyń prototıpi Álıhan bolǵanyn jınalǵan qaýymǵa baıandap berdi.
Mektep oqýshylarynyń atynan plenarlyq májiliste sóz sóıleý múmkindigine ıe bolǵan 9-synyp oqýshysy Abylaı Qaıratuly «Álıhanǵa arnaý» jyryn oqyp, «Álıhan taǵylymy» baıandamasyn jasady.
№76 mektep-lıeıdegi halyqaralyq ǵylymı-tájirıbelik konferenııa jalpy 4 sekııalyq otyrysta óz jumysyn jalǵastyrdy. Olar:
1. Álıhannyń qazaq tarıhyn zertteýge qosqan úlesi
2. Álıhan Bókeıhan – qazaqtyń tuńǵysh kásibı jýrnalıst, tuńǵysh pýblıısti
3. Álıhan Bókeıhannyń pedagogıkalyq kózqarastary
4. Álıhan Bókeıhan – azamattyqtyń jarqyn úlgisi
Osy sekııalarǵa arnap Astana qalasynan bólek, Aqmola, Qaraǵandy, Shyǵys Qazaqstan, Jetisý, Atyraý oblystarynyń muǵalimderi men oqýshylary óz ǵylymı baıandamalaryn jibergen.
Kelgen qonaqtar men konferenııaǵa qatysýshylar mekteptegi Álıhan Bókeıhan murajaıynda bolyp, olarǵa joǵary synyp oqýshylary ekskýrsovod qyzmetin kórsetip, bilim ordalarynyń atyn ıelengen tulǵanyń ómiri týraly mańyzdy derektermen tanystyrdy. Sonymen qatar, mektep-lıeıdiń alǵyr shákirtteri «Álıhan jáne Alash» zııatkerlik ústel oıynyn kórsetti. Bul oıyn birneshe jyldan beri mekteparalyq saıys retinde Astana oqýshylaryna týǵan tarıhty tanytýdaǵy zamanaýı ádis retinde qyzmet etip keledi.
Plenarlyq májilisten soń, kelgen qonaqtar ár synypqa baryp, dástúri «Rýh sabaǵyn» ótkizdi. «Ultyna, jurtyna qyzmet etý – bilimnen emes, minezden» dep Álıhan Bókeıhan aıtyp ketkendeı, táýelsizdiktiń tuǵyryn nyǵaıtyp, keleshek úshin aıanbaı qyzmet eter minezdi muǵalimder men sanaly shákirtter osyndaı ıgi sharalarda shyńdalyp shyǵary anyq.
Alma Saılaýqyzy
