Kólsaı kólderi aýmaǵynda tazalyq jáne ekologııalyq normalardy saqtaý boıynsha keshendi jumystar jasalýda. Bul týraly «Kólsaı kólderi» MUTP ákimshiliginen habarlady.
Aıta keteıik, áleýmettik jelide balyq aýlaýshylardan kól betinde qalǵan qoqys týraly vıdeo taraǵan edi.
Ulttyq park ákimshiliginiń habarlaýynsha vıdeo taraǵan kezde kól aýmaǵynda qoqystan tazalaý boıynsha keshendi jumystar júrgizilip jatqan. Ulttyq park aýmaǵynda kelýshilerge tazalyq saqtaý men tabıǵat erejeleri týraly aqparat udaıy beriledi. Sondaı-aq, tazalyq jumystary turaqty júrgiziledi. Mysaly, 2024 jyldyń qańtar-qyrkúıek aılarynda Kólsaı kólderi aýmaǵynan 80 tonna qatty turmystyq qaldyq shyǵarylǵan.
Al vıdeony túsirip, tabıǵatqa janashyrlyq tanytqan azamatqa alǵys bildirgen Ulttyq park ákimshiligi qoqys pen balyq aýlaýshylar men demalýshylar qaldyrǵan qaldyqtar sol kúni-aq tolyqtaı tazalanǵanyn habarlady. Sondaı-aq, tazalyq erejelerin buzǵan balyq aýlaýshylarǵa ákimshilik jaýapkershilik týraly eskertilip, Ulttyq park aýmaǵynda ekologııalyq normalardy qatań saqtaý týraly aqparat berilgen.
«Mereke jáne demalys kúnderi balyq aýlaýshylar men týrıster sany aıtarlyqtaı ósedi. Bul kúnderi Ulttyq park qyzmetkerleri kúsheıtilgen jumysqa kóship, tazalyq pen tártipti saqtaý sharalaryn qamtamasyz etýge tyrysady. Alaıda ókinishke qaraı, tabıǵatqa janashyrlyqpen qaramaıtyn adamdar da jıi kezdesedi. Ulttyq park aýmaǵyna kelýshilerge bul tek demalys aýmaǵy ǵana emes, tabıǵı baılyǵymyz ekenin sezinip, jaýapkershilikpen qaraýyn suraımyz», deıdi Ulttyq parkte.
Qazirgi kezde Kólsaı kólderi aýmaǵynda baqylaý kúsheıtilip, ınspektorlar men Ulttyq park qyzmetkerleriniń sany kóbeıtilgen. Árbir eki saǵat saıyn reıd ótkiziledi.
Kól aýmaǵynda kelýshilerge zańsyz balyq aýlaýǵa tıym salynǵany, ereje buzýshylyq úshin aıyppul qarastyrylǵany, tazalyq saqtaý týraly aqparat berilip, eskertý jasalady. Al janashyr azamattardy ekologııalyq mádenıetti qalyptastyrý baǵytynda birge jumys isteýge shaqyrady.
«Biz bul baǵytta eriktilermen, blogerlermen, tabıǵatqa janashyr azamattarmen turaqty túrde ekologııalyq akııa, is-sharalar ótkizip, ekologııalyq mádenıetti qalyptastyrý baǵytynda halyqqa aqparat jetkizgimiz keledi. Óıtkeni Kólsaı kólderi syndy tabıǵı baılyqty saqtaýdyń mańyzdylyǵyn eń birinshi kezekte qoǵam túsinse deımiz. Tabıǵatty qorǵaý isinde janashyr azamattar atsalysyp, bizdiń seriktes, qoldaýshylarymyzdyń qatarynda bolýǵa shaqyramyz», deıdi MUTP ákimshiligi.
Aıta keteıik, 2024 jyly Almaty oblysy týrızmniń qarqyndy damýy boıynsha rekordtyq kórsetkishterge qol jetkizdi. Qańtar men qazan aralyǵynda aımaqqa 1,6 mıllıon týrıst kelgen. Onyń ishinde «Kólsaı kólderi» týrıster eń kóp kelgen nysandardyń biri. Munda 2024 jyly 394 903 demalýshy kelgen. Bul kórsetkishter elimizde ishki týrızm damyp, týrıster kóbeıgenin kórsetedi, alaıda sonymen qatar, ekologııalyq mádenıetti arttyrý qajettiligi baıqalady.
