ءاليحان بوكەيحانعا ارناپ استانا مەكتەبىندە عىلىمي كونفەرەنتسيا ءوتتى

2746
Adyrna.kz Telegram

5 ناۋرىز – ۇلت كوشباسشىسى ءاليحان بوكەيحاننىڭ تۋعان كۇنى. وسى ءبىر ماڭىزدى داتاعا ورايلاستىرىپ، استانا قالاسىنداعى ءا.بوكەيحان اتىنداعى №76 مەكتەپ-ليتسەيى 3 ناۋرىز كۇنى «ءاليحان بوكەيحان جانە رۋحاني سەرپىن» اتتى حالىقارالىق عىلىمي-تاجىريبەلىك كونفەرەنتسيا وتكىزدى. بۇرىن مۇنداي اۋقىمدى تاقىرىپ پەن جوعارى دارەجەدەگى عىلىمي جيىندى تەك جوو-لاردىڭ قابىرعالارىنان عانا كورسەك، 76-مەكتەپ بۇل قاعيداعا وزگەرىس ەنگىزىپ، تىڭنان تۇرەڭ سالدى. مەكتەپتەگى مۇعالىمدەر مەن وقۋشىلاردى عىلىمي ىزدەنىس جاساۋعا ۇندەپ، دەرەك پەن دايەككە، تۇجىرىمدارعا نەگىزدەلگەن پايىم جاساۋعا تۇرتكى بولعان سالماقتى يدەيا جۇزەگە استى.

شالعايداعى جانە استانالىق مەكتەپتەردەن ۇزىن سانى 80 عىلىمي ماقالا كەلىپ تۇسكەنىن مەكتەپ ديرەكتورى بوتاكوز بولاتبەكقىزى ءوز سوزىندە ايتىپ ءوتتى.

«شارانىڭ ماقساتى – ءاليحان بوكەيحاننىڭ قوعامدىق-ساياسي قىزمەتىن جاڭا تاريحي كوزقاراس تۇرعىسىنان قورىتىپ، ساياسات ساحناسىنداعى باتىل قادامدارىن وسكەلەڭ ۇرپاققا كەڭىنەن ناسيحاتتاۋ»، دەدى ول.

ء​ىس-شارا ونەرپازداردىڭ ۇلتتىق رۋحتى سىلكىنتەر ەرەكشە انىمەن باستالدى. وڭ جاق تاراپتا – اتا-اجەلەر قاۋىمىنان جاساقتالعان حور، سول جاق تاراپتا – مەكتەپ وقۋشىلارىنىڭ حورى، ال ورتاسىندا ۇلتتىق اسپاپتاردى شەرتىپ، رۋحتى اندەردى شىرقاعان ۇلاندار جينالعان كوپشىلىككە ەرەكشە اتموسفەرا سىيلادى. وركەستر جەتەكشىسى، ءارى بايانمەن سۇيەمەلدەۋشى – مەكتەپتىڭ مۋزىكا ءپانىنىڭ مۇعالىمى تاعىباەۆ جالدىباي بايعاراۇلى.

مەكتەپ شاڭىراعىندا وتكەن عىلىمي كونفەرەنتسياعا س.ا.ءجۇسىپ، ن.ج.قاليەۆ، ءو.سۇلتانۇلى، ت.س.شاكەن، ۇ.ءسايدىراحمان، ن.قوڭىرباي، ا.سايلاۋقىزى، ۇ.دالەيۇلى جانە تاعى باسقا الاشتانۋشى عالىمدار مەن قوعام قايراتكەرلەرى قاتىسىپ، ءسوز الدى. ونلاين بايلانىس ارقىلى ءاليحان بوكەيحان تۋرالى ورىس تىلىندە 9 تاراۋدان تۇراتىن كىتاپ جازعان رەسەيلىك عالىم ۆيكتور كوزودوي بايانداما جاساپ، ءوز تۋىندىسىن جازۋ كەزىندە 2 ەلدىڭ 10 قالاسىنان 12 ءارحيۆتىڭ قۇجاتتارىن نەگىز ەتكەنى تۋرالى ايتتى.

مەكتەپ ۇستازدارىنان ورازحان وستاەۆا (تاريح ءپانىنىڭ مۇعالىمى) «ۇلىلار مەكەنىنە ساياحات» اتتى بايانداما جاساپ، ءاليحاننىڭ تۋعان وڭىرىنە وقۋشىلارىن اپارۋ بارىسى تۋرالى، شاكىرتتەرىنىڭ كورگەنى مەن تۇيگەنى تۋرالى تاجىريبەسىمەن ءبولىستى. ال قازاق ءتىلى مەن ادەبيەتى ءپانىنىڭ مۇعالىمى گۇلميرا قالجاتايقىزى «ءاليحاننىڭ قاناتتى سوزدەرىنىڭ ومىرشەڭدىگى» اتتى بايانداماسىندا ۇلت كوسەمىنىڭ ەڭ اسەرلى، ەڭ وزەكتى ناقىل سوزدەرىنە باسا توقتالدى. سونداي-اق ىسقاقوۆ مەيرامبەك مىرزا ءوز سوزىندە «اباي جولى» رومان-ەپوپەياسىنداعى تورە ۇرپاعى ازىمقاننىڭ ءپروتوتيپى ءاليحان بولعانىن جينالعان قاۋىمعا بايانداپ بەردى.


مەكتەپ وقۋشىلارىنىڭ اتىنان پلەنارلىق ماجىلىستە ءسوز سويلەۋ مۇمكىندىگىنە يە بولعان 9-سىنىپ وقۋشىسى ابىلاي قايراتۇلى «اليحانعا ارناۋ» جىرىن وقىپ، «ءاليحان تاعىلىمى» بايانداماسىن جاسادى.
№76 مەكتەپ-ليتسەيدەگى حالىقارالىق عىلىمي-تاجىريبەلىك كونفەرەنتسيا جالپى 4 سەكتسيالىق وتىرىستا ءوز جۇمىسىن جالعاستىردى. ولار:
1. ءاليحاننىڭ قازاق تاريحىن زەرتتەۋگە قوسقان ۇلەسى
2. ءاليحان بوكەيحان – قازاقتىڭ تۇڭعىش كاسىبي جۋرناليست، تۇڭعىش ءپۋبليتسيستى
3. ءاليحان بوكەيحاننىڭ پەداگوگيكالىق كوزقاراستارى
4. ءاليحان بوكەيحان – ازاماتتىقتىڭ جارقىن ۇلگىسى
​وسى سەكتسيالارعا ارناپ استانا قالاسىنان بولەك، اقمولا، قاراعاندى، شىعىس قازاقستان، جەتىسۋ، اتىراۋ وبلىستارىنىڭ مۇعالىمدەرى مەن وقۋشىلارى ءوز عىلىمي باياندامالارىن جىبەرگەن.
​كەلگەن قوناقتار مەن كونفەرەنتسياعا قاتىسۋشىلار مەكتەپتەگى ءاليحان بوكەيحان مۇراجايىندا بولىپ، ولارعا جوعارى سىنىپ وقۋشىلارى ەكسكۋرسوۆود قىزمەتىن كورسەتىپ، ءبىلىم وردالارىنىڭ اتىن يەلەنگەن تۇلعانىڭ ءومىرى تۋرالى ماڭىزدى دەرەكتەرمەن تانىستىردى. سونىمەن قاتار، مەكتەپ-ليتسەيدىڭ العىر شاكىرتتەرى «ءاليحان جانە الاش» زياتكەرلىك ۇستەل ويىنىن كورسەتتى. بۇل ويىن بىرنەشە جىلدان بەرى مەكتەپارالىق سايىس رەتىندە استانا وقۋشىلارىنا تۋعان تاريحتى تانىتۋداعى زاماناۋي ءادىس رەتىندە قىزمەت ەتىپ كەلەدى.
​پلەنارلىق ماجىلىستەن سوڭ، كەلگەن قوناقتار ءار سىنىپقا بارىپ، ءداستۇرى «رۋح ساباعىن» وتكىزدى. «ۇلتىنا، جۇرتىنا قىزمەت ەتۋ – بىلىمنەن ەمەس، مىنەزدەن» دەپ ءاليحان بوكەيحان ايتىپ كەتكەندەي، تاۋەلسىزدىكتىڭ تۇعىرىن نىعايتىپ، كەلەشەك ءۇشىن ايانباي قىزمەت ەتەر مىنەزدى مۇعالىمدەر مەن سانالى شاكىرتتەر وسىنداي يگى شارالاردا شىڭدالىپ شىعارى انىق.

الما سايلاۋقىزى

پىكىرلەر