Búgin, 6 aqpan kúni 4%-dyq jeńildikpen avtonesıege ótinim berý bastalǵan bolatyn. Alaıda, portal júktemeni kótere almaı qalǵan. Tipti, saǵat 10:00-diń ózinde 761 adam tirkelip úlgergen. Bul týraly jýrnalıst Dıas Nuraqyn Facebook paraqshasynda jazdy, dep habarlaıdy “Adyrna” ulttyq portaly.
“Elektrondy kezekke degen kúmán qoıýlandy. Tanystarym, dostarym, oqyrmandarymnyń eshqaısysy tirkelmegen. Keıbiri osy kezekti men oılap tapqandaı jekege jazyp, renjip jatyr.
Tańnan beri 50 shaqty adam habarlasty. Sonyń birde bireýi ilikpegen. Maqtaýly portaldary júktemeni kótere almaı qaldy. Biraq ınsaıderlik aqparat boıynsha 761 adam ótinish berip úlgeripti. Sońǵy zaıavka 10,00 de tirkelipti. Demek biz klavıatýrany toqpaqtap, EP-nyń qupııa sózin jazyp, ashylmaı qalǵan kólik óndirýshi degen batyrmany basa almaı otyrǵanda, "óz adamdary" tirkelip ketken. Biraq qazannyń qaqpaǵyn ustap otyrǵandardyń qandaı quıtyrqylyqqa barǵanyn dáleldeý qıyn”,- dep jazdy ol.
Sondaı-aq, Dıas Nuraqyn Baǵdat Mýsın men ónerkásipti damytý qorynan tekserýdi talap etti.
“Mýsın Baǵdat myrza elektrondy kezektiń ashyq ári ádil bolǵanyn halyqqa dáleldep berińizder.
Ónerkásipti damytý qory arnaıy brıfıng ótkizip, kezekke kimderdiń tirkelgenin jasyrmaı jarııalańyzdar. Qaı qala, qaı oblystan ekeni de mańyzdy. Ne sebepti "oıbka" degen sózdiń shyǵa bergenin túsindirińizder. Ne sebepti "kólik óndirýshini tańdaý" degen batyrmanyń shyqpaı qalǵanyn ashyq aıtyńyzdar. Meniń oıymsha osynyń bári belgili bir adamdardyń ǵana tirkeýge turýy úshin ádeıi, qoldan qasaqana jasalǵan kedergiler boldy.
QR Indýstrııa jáne ınfraqurylymdyq damý mınıstrligi túıequs qusap, bastaryńyzdy qumǵa tyǵyp alyp otyrýdy qoıý kerek. Estıtin úkimet qaǵıdasyna saı halyqtyń jappaı narazylyǵyn týdyrǵan jeńildetilgen avtonesıe baǵdarlamasyndaǵy kemshilikterge qatysty óz oılaryńyzdy aıtyńyzdar. Tipti búgingi elektrondy kezek nátıjesin jaramsyz dep tanyp, qaıta ótkizýdi talap etemiz”, - dep jazdy jýrnalıst.
