Jambyl oblysy ákimdiginiń memlekettik satyp alý basqarmasy jańa qyzmettik kólik satyp alýǵa tender jarııalady, dep habarlaıdy “Adyrna” ulttyq portaly Memlekettik satyp alý saıtyna siltep.
Ákimdiktiń baspasóz qyzmetiniń málimetinshe, qazirgi ýaqytta basqarma balansynda 2018 jyly shyǵarylǵan Skoda markaly avtokólik bar. Onyń jalpy júrisi 297 000 shaqyrymǵa jetip, jıi isten shyǵýyna baılanysty kúrdeli jóndeýdi qajet etedi. Osy sebepti kólikti tehnıkalyq qyzmet kórsetýdiń shyǵyny artyp, ony paıdalaný tıimsiz bolyp otyr.
Mekeme ókilderiniń aıtýynsha, jańa kólikti satyp alý úshin qarjy 2025 jylǵa arnalǵan bıýdjette qarastyrylǵan. Memlekettik satyp alý portalynda jarııalanǵan lotqa sáıkes, jańa kólik S-klass sanatyna jatýy tıis jáne ony satyp alýǵa 22 mıllıon teńge bólingen.
Ákimdik ókilderi bul sheshim qoldanystaǵy normatıvtik-quqyqtyq aktilerge sáıkes júzege asyrylyp otyrǵanyn atap ótti.
