Sheteldikterdiń Qazaqstanda qalý merzimi qysqardy. Bul týraly Ishki ister mınıstrligi ımmıgranttardyń Qazaqstanǵa kirý jáne elde qalý erejeleriniń qalaı ózgeretinin túsindirdi, dep habarlaıdy “Adyrna” ulttyq portaly.
Immıgranttardyń Qazaqstanǵa kelý jáne elde qalý erejesine engizilgen ózgertýlerge sáıkes, Qazaqstanǵa kirý úshin vıza talap etilmeıtin sheteldikter elde 30 kún bola alady. Biraq 180 kún (alty aı) ishinde olardyń jalpy bolý merzimi 90 kúnnen aspaýy kerek.
"Qazaqstanǵa kelgen EAEO azamattary 180 kún ishinde tek 90 kún ǵana respýblıka aımaǵynda bola alady. Erejeniń aldyńǵy nusqasynda bul másele sheshilmegen bolatyn. Sheteldikter el aýmaǵynda bolý merzimi aıaqtalǵannan keıin Qazaqstannan shyǵyp, qaıta kire alatyn edi. Qazir bul sharttarǵa ózgeris engizildi", – dep atap ótti mınıstrlik.
Jańa shekteýler kezinde ýaqytsha turýǵa ruqsat nemese vıza alǵan sheteldikterge qoldanylmaıtyny atap ótildi. Basqarma osyndaı talaptardyń halyqaralyq tájirıbede de qoldanylatynyn atap kórsetedi. Atap aıtqanda, Qazaqstan azamattary Belarýs pen Reseı aýmaǵynda 180 kún ishinde 90 kúnnen aspaıtyn merzimde bola alady.
Sonymen birge, "Quqyqtyq aktiler týraly" Zańǵa sáıkes normatıvtik quqyqtyq aktiniń kúshi ol qoldanysqa engizilgenge deıin kirgenderge qoldanylmaıdy. Iaǵnı, erejege engizilgen ózgerister 2023 jyldyń 27 qańtarynan bastap Qazaqstanǵa kelgen sheteldikterge qatysty bolady.
"Eger Qazaqstanǵa kirgen kezde belgilengen jáne ruqsat etilgen el aýmaǵynda qalý merziminen asyp ketkeni anyqtalsa, Shekara qyzmeti "Halyqtyń kóshi-qony týraly" zańnyń 48-babyna sáıkes elge kirýge shekteý qoıady", – dep qorytyndylady mınıstrlik.
