Qytaidan Qazaqstanǧa sälemdeme jetkızu merzımı ūzaruy mümkın. Būl turaly Cargo 092, Jana Post jäne Luna Cargo tasymaldau qyzmetterı eskerttı, dep habarlaidy «Adyrna» tılşısı.
11 qazanda Cargo 092 kompaniiasy Qazaqstan men Qytai şekarasynda jük kölıkterınıŋ ūzyn-sonar kezegı paida bolǧanyn jetkızdı. Ötkızu beketterınıŋ şamadan tys jükteluıne bailanysty jetkızu merzımı ūzaruy mümkın.
«Qytai tarapyndaǧy jaǧdaiǧa yqpal etıp, şekaradan ötu uaqytyn jedeldete almaimyz», – dep mälımdedı kompaniia.
Tasymaldauşy barlyq jüktıŋ baqylauda ekenın aityp, klientterden tauar jetkızudı josparlau kezınde yqtimal kıdırısterdı eskerudı sūrady.
Jana Post kompaniiasy jetkızılımderdıŋ keşıguın Qytaidaǧy merekelerge bailanysty şekaranyŋ uaqytşa jabyluymen tüsındırdı. 7 qazanda jariialanǧan habarlamada şekaranyŋ qaita aşylǧany jäne jinalyp qalǧan sälemdemelerı bar jük kölıkterı kezekpen ötkızılıp jatqany aitylǧan.
Kompaniianyŋ saityndaǧy aqparatqa säikes, Jana Post Temu, Pinduoduo jäne Taobao platformalarynan tapsyrys jetkızumen de ainalysady.
Qazaqstandaǧy tasymaldauşynyŋ sūryptau ortalyǧy täulık boiy jūmys ısteidı. Al bölımşelerı kün saiyn saǧat 10:00-den 20:00-ge deiın üzılıssız qyzmet körsetedı.
Luna Cargo da şekara aşylǧannan keiın jük kölıkterı kele bastaǧanyn habarlady. Ädette Almatyǧa jük jetkızuge 6–8 kün qajet. Alaida mereke künderı jinalyp qalǧan jükterdı tasymaldauǧa qosymşa uaqyt kerek bolady.
Kompaniia klientterden qoimada oryn bosatu jäne jaŋa jükterdı qabyldauǧa mümkındık jasau üşın kelgen sälemdemelerın tezırek alyp ketudı sūrady. Kelesı jüktıŋ naqty qaşan keletının tasymaldauşy aldyn ala bılmeidı. Jükter tranzittık qoimaǧa tüsken boida jöneltıp alynady.
Jetkızu merzımderı qaşan qalypty jaǧdaiǧa oralatyny kompaniialardyŋ jariialaǧan habarlamalarynda naqtylanbaǧan.
Būǧan deiın Memlekettık kırıster komitetı Qytai Halyq Respublikasynyŋ qūrylǧan künıne bailanysty 1–3 qazan aralyǧynda Qytaimen şekaradaǧy avtomobil ötkızu beketterı jabylatynyn eskertken edı. Komitettıŋ mälımetınşe, būl şekteuler temırjol ötkızu beketterıne qatysty bolmaǧan.
