Elimizde medıına salasyndaǵy stýdentterdiń shákirtaqysy jyl saıyn 20%-ǵa deıin ósedi. Bul týraly Densaýlyq saqtaý mınıstrliginiń Ǵylym jáne adamı resýrstar departamentiniń baspasóz qyzmeti aıtty, dep habarlaıdy «Adyrna» tilshisi.
«2025 jylǵa deıin shákirtaqyny jyl saıyn 15% jáne 20%-ǵa ulǵaıtý josparlanýda. Bul jaqsy oqýǵa qosymsha serpin beredi jáne bizdiń JOO-larǵa myqty talapkerlerdi qosymsha tartady», - dedi QR DSM ǴARD dırektory Dáýlet Aldyńǵurov.
Sonymen qatar 2023 jyly Memleket basshysynyń tapsyrmasyn iske asyrý maqsatynda respýblıkalyq bıýdjettiń esebinen rezıdentýra granttarynyń sanyn 2500-ge deıin ulǵaıtý josparlanyp otyr.
Aıta keteıik, sońǵy jyldary Prezıdent pen «Amanat» partııasynyń tapsyrmasy boıynsha shákirtaqy aıtarlyqtaı ósti. Mysaly, bakalavrıat úshin ol 2 esege jýyq, ınternderde 25%-ǵa, rezıdentterde, magıstranttarda, doktoranttarda 2021 jyly 15%-ǵa ulǵaıdy.
