Dınara Sátjan Prezıdentten eki aıǵa qamaýǵa alynǵan otandyq jýrnalıst Mıhaıl Kozachkovty bosatýdy surady. Bul týraly ol Instagram paraqshasynda jazdy, dep habarlaıdy “Adyrna” ulttyq portaly.
“Biz QazUÝ-niń jýrnalıstıka fakýltetinde bir topta 5 jyl birge oqydyq. Ol shyndyq úshin shyryldap, ádildik úshin kúresetin. Onyń Telegram-daǵy kanalyna 90 myń adam jazylǵan. Onyń 70%-y elordamyzdyń sol jaq jaǵalaýynda turatyn sheneýnikter. Ol jemqorlyq týraly jazýǵa qoryqty dep oılaısyzdar ma? Meniń oıymsha, joq. Mıhaıl óz isiniń mamany. Ol zańdy jaqsy biledi. Sondaı-aq, ol ózin ańdyp, baqylap otyratyn adamdardyń baryn jaqsy túsinetin”, – deıdi Dınara Sátjan.
Telejúrgizýshiniń aıtýynsha, ony ashyq túrde qorqytqandar da tabylǵan.
“Jazda Mıhaıldiń avtokóligin zaqymdap ketti. Ony otbasymen qorqytty. Iá, ol kóp adamǵa kedergi boldy. Biraq tanymal jýrnalıstti reıdererlik jasady, onsyz da bárine qoljetimdi memlekettik qupııany taratty dep aıyptap, túrmege toǵytý – ádiletsizdik. Sot ádil ótedi dep senemin. Al Elbasymyzdan Mıhaıl Kozachkovty úıqamaqqa shyǵarýdy suraımyn. Ol qoǵamǵa esh qaýip tóndirmeıdi. Ol kisi óltirýshi emes. Pedofıl, zorlaýshy emes. Ol jýrnalıst. Onyń qarýy – shyndyq. Ay, biraq shyndyq! Bolmasa, Qazaqstandaǵy jýrnalıstik zertteýden bas tartaıyq”, – dep jazdy ol.
