Atyraý jurtshylyǵymen kezdesý ótkizgen Qasym-Jomart Toqaev jastarǵa energetıkalyq sýsyn satýǵa tyıym salý máselesin qarastyrýdy tapsyrdy. Sonymen qatar oqýshylardyń elektrondy temekige áýestigi týraly da aıtyp ótti, dep habarlaıdy “Adyrna” ulttyq portaly.
«Qazir eresekterdiń ermegine aınalǵan elektrondy temekige oqýshylar da áýestenip barady. Mundaı temekini balalar dúkennen esh kedergisiz satyp alady. Bul – qaýipti jaǵdaı. Qoǵamda energetıkalyq sýsyndardy jastarǵa satýǵa tyıym salý qajettigi jıi aıtylady. Úkimet bul máseleni muqııat zerdelep, naqty sheshim qabyldaýy kerek», - dedi ol.
