Prezıdent Qasym-Jomart Toqaev HH ǵasyrdaǵy saıası qýǵyn-súrgin materıaldaryn zertteý ortalyǵynyń jumysymen tanysty. Bul týraly Aqordanyń baspasóz qyzmeti málimdedi, dep habarlaıdy “Adyrna” ulttyq portaly
Memleket basshysy ortalyqta qujattardy saqtaý shartymen, muraǵat qujattaryn qalpyna keltirý jáne mıkrofılmdeý kabınetteriniń jumysymen tanysty. Sonymen qatar Memleket basshysyna ótken ǵasyrdaǵy saıası qýǵyn-súrgin tarıhyna qatysty materıaldar boıynsha júrgizilgen jumystardyń ekspozıııasy kórsetildi.
Prezıdenttiń Jarlyǵymen 2020 jyldyń qarasha aıynda HH ǵasyrdaǵy saıası qýǵyn-súrgin qurbandaryn tolyq aqtaý jóninde memlekettik komıssııa quryldy. Memlekettik komıssııanyń jumysyna qoldaý kórsetý maqsatynda 2021 jyly HH ǵasyrdaǵy saıası qýǵyn-súrgin materıaldaryn zertteý ortalyǵy ashyldy. HH ǵasyrdyń 30-50 jyldaryndaǵy saıası qýǵyn-súrgin tarıhyna qatysty materıaldar Ortalyqqa IIM, UQK, Bas prokýratýranyń arnaýly muraǵattarynan beriledi. Ortalyq taıaý ýaqytta barlyǵy 715 myńǵa jýyq isti qabyldap alady dep josparlanyp otyr. Munda qujattardy qupııasyzdandyrý, qalpyna keltirý jumystary júzege asyrylady. Olardy zertteý jáne ǵylymı aınalymǵa engizý úshin tıisti jaǵdaı jasalǵan, delingen habarlamada.
Qazirgi ýaqytta tarıhshy-ǵalymdar men ortalyq qyzmetkerleri «Alashorda isi. 1920-1940 jj. Qujattar men materıaldar» atty kóptomdyqty baspaǵa daıyndap jatyr. Bul basylym HH ǵasyrdaǵy Qazaqstannyń saıası tarıhynyń ǵylymı kókjıegin keńeıtedi. Ortalyqtyń qorynda 1 mıllıon 132 myń is saqtalǵan. Memleket basshysy tarıhymyzdy zerdeleý isinde Ortalyqtyń jumysy mańyzdy ekenin atap ótip, ujymǵa sáttilik tiledi.
