Búgin boıyna kúlli batyr-qahanmandarynyń rýhyn jınaǵan jáne ómirimen, órligimen qazaq azamatynyń naǵyz beınesine aınalǵan Baýyrjan Momyshulynyń týǵan kúni. Jyldar jylystap ótse de, Baýyrjan Momyshulynyń keleli pikir, kenen oılary, kózsiz erligi men parasatty tulǵasy qazaqtyń rýhyn bıiktetip, mereıin ósire beretini anyq. "Adyrna" ulttyq portaly qaharmannyń qurmetine Batyr Baýyrjannyń qanatty sózderin usynady.
* Ádildikti moıyndaý - adal kisiniń isi.
* Opasyzdyq - oısyzdyq.
* Qýys keýde bolǵannan artyq qorqynysh ta, qorlyq ta joq.
* Baqanyń baǵynan suńqardyń sory artyq.
* Namysty nanǵa satpa.
* Qarabet bolyp qashqansha - qaırat kórsetip ólgen artyq.
* Óz ultyn syılamaý, ony maqtanysh etpeý - satqyndyq.
* Imenip júrip kórgen ıgilikten - qarsylasyp júrip kórgen beınet artyq.
* Ótiriktiń balyn jalap tiri júrgenshe - shyndyqtyń ýyn ishin ólgen artyq.
* Erlik - eldiń qasıeti, júrektilik - jigittiń qasıeti.
* Eshkim ishten batyr bolyp týmaıdy: batyrlyq ta, minez sekildi ósken orta, kórgen tárbıege baılanysty qalyptasady.
* Batyrlyq táýekel men aqyldyń esebinen shyǵýǵa tıis. Táýekel keıde aqyldy da aqtap alady. Al aqylsyz táýekeldi eshteńe de aqtap ala almaıdy.
* Ata-ana qadirin bilmegen - el qadirin bile almas,
El qadirin bilmegen - ata-ana qadirin bile almas.
* Dúnıede balanyń ý-shýyna jeter ne bar?!
Odan asqan sazdy áýen oılap tabý múmkin emes.
* Til - ult qasıetin aıqyndaıtyn belgi, ulttyq salt-sana ózegi.
* Anamyzdyń aq sútimen boıymyzǵa daryǵan ana tilimizdi umytý - búkil ata-babamyzdy, bar tarıhymyzdy umytý.
* Qazaq tili - sulýlyǵymen boı balqytyp, tamyr shymyrlatatyn, jan júıeńdi jandyryp, qulaq quryshyn qandyratyn, ótkirligimen qysyltaıań tusta er men elge birdeı medet berip, adam túgil jaǵdaıdyń óziniń aýzyna qum quıatyn ǵajaıyp kemel til.
* Jaqsy sóz janǵa - jaqyn, qulaqqa - jaǵymdy, oıǵa - qonymdy keledi.
* Sóz jylata da, jubata da alady.
* Til tazalyǵy úshin kúres - eshqashan tolastamaıtyn máńgilik kúres.
* Tilekke - eńbek tirek.
* Terlep eńbek etersiń - tilegińe jetersiń.
* Tárbıeli - tártiptiń quly,
Tártipti - eldiń quly.
* Qaıratyńa - ádisińdi joldas et, ádisińe - aqylyndy joldas et.
* Tártipsiz el bolmaıdy, tártipke bas ıgen el - qul bolmaıdy.
* Qaırat eter kezinde - júk kóterer nardaı bol,
Aqyl aıtar kezińde - júz jasaǵan shaldaı bol.
* Ylǵı altyn izdeme - shoqtyń bári ot bolmas.
* Kúnshildik - ózgeniń myqtylyǵy men ózińniń álsizdigindi moıyndaýdan týǵan qubylys.
* Erlik - taısalmas tabandylyq pen qaıyspas qaısarlyqtan shyǵady.
* Órshil rýhtan - ólmes erlik týady.
* Úmit - órge tartady, úmitsizdik - kórge tartady.
* Jerge - ter tógip, halyqqa - qan tógip qyzmet etýden taısalma!
* Beldeskenniń - belin syndyr, tireskenniń - tizesin búktir.
* Eptilik te - erlik.
* Qolbasshy bolsań sondaı bol - josylyp jatqan joldaı bol.
* Ot basynyń ónegesi - Otan ónegesi.
* Halyqtyq tájirıbe - búginge ǵana emes, erteńge de kerek qazyna.
* Sulý sózge qul bolma - zerli oı onda kóp bolmas.
* Úmitin joǵaltqan jan - eshqashan úmittenip kórmegen jan.
* Til - ult qasıetin aıqyndaıtyn belgi, ulttyq salt-sana ózegi.
* Til - eldiń eldiginiń, onyń ǵylymy men mádenıetiniń, ónerkásibiniń, qoǵamdyq qurylysynyń, salt-sanasynyń, jaýyngerlik dástúriniń, ulttyq murasynyń qaı dárejede ekenin bildirip turatyn kórsetkish.
* Ana tilimizge mán bermeýshilik, ony qurmettemeý - shynaıy patrıottar tárbıeleý jumysyna úlken zııan.
* Qazaq tili esh ýaqytta ózimen kórshi halyqtardyń tilderinen sorly bolyp, qatardan qalmaǵany, óz sybaǵasyn eshkimge jibermegendigine myń jyldyq kóne tarıh kýá.
"Adyrna" ulttyq portaly
