Kúni keshe akademık Ábilqas Saǵynov atyndaǵy Qaraǵandy tehnıkalyq ýnıversıtetinde 15 qarasha – Batyrlar kúnine oraı jarııalanǵan «Batyrlar murasy» onkúndigi aıasynda bıylǵy jyly mereıtoıy atalyp ótip jatqan Aqjoltaı Aǵybaı batyrdyń 220 jyldyq mereıtoıyna oraı «Aǵybaı batyr – el qorǵany» atty dóńgelek ústel ótti. Bul sharada Aǵybaı batyrdyń ómiri men el qorǵaýdaǵy eńbegi sóz boldy.
Aıta ketý kerek, batyr óz zamanynda el qorǵaýda úlken qajyr – qaıratymen tanylyp, otarlyq ezgige qarsy kúresip, úsh júzdiń basyn biriktirgen qazaqtyń sońǵy hany Kenesary Qasymulynyń senimdi serikteriniń biri bolǵan. El arasynda urysta, joryq - jortýylda únemi joly bolatyndyqtan «Aqjoltaı batyr» atanǵan. Sonymen qatar ol esimi uranǵa aınalǵan daryndy qolbasshy. Qazaq jerin otarlyq ezgiden qorǵaýdy aldyna maqsat etken batyr Qarqaraly aımaǵynda patshalyqtyń otarshyldyq saıasatyna qarsy kóteriliske belsene aralasyp, 1826-1846 jyldar aralyǵynda otarshyldardyń áskerine birneshe ret kúırete soqqy berdi. Al Kenesary Qasymuly ómirden ótken soń qazaqtyń azattyǵy jolynda kúresin toqtatpaı, Syzdyq tóre qolynyń quramynda áskerı qımyldardy júrgizdi.
Jınalǵandarǵa batyrdyń osynaý el aldyndaǵy eńbegi jaıly ýnıversıtettiń tarıh kafedrasynyń oqytýshysy N.Oshan, stýdentter B.Sahabaı, Sh.Turǵyn, A.Ǵalym, J.Baýyrjan, M.Dúkenbaı, A.Turarbek, J.Janatbek, A.Áýelhan, D.Jeksenbaı, Á.Murat jáne sharaǵa arnaıy qatysqan qonaqtar Qaraǵandy Ýnıversıtetiniń tarıh fakýltetiniń dekany J.Jumabek, Aǵybaı batyrdyń urpaǵy Qaraǵandy tehnıkalyq ýnıversıtetiniń professory, fılologııa ǵylymdarynyń doktory B.S.Ismak aıtyp berdi.
«Batyrlar murasy» onkúndigi sharasy aıasynda josparlanǵan kelesi shara 24 qarasha kúni Qaraǵandy polıtehnıkalyq kolledjinde ótedi. Bul joly ótetin ǵylymı – tanymdyq konferenııa qazaqtyń Batyrlar ınstıtýtynyń kórnekti ókilderi qazaqtyń sońǵy hany Kenesary Qasymulynyń 220 jyldyǵyna, Eset batyr Kókiulynyń 355 jyldyǵyna, Aǵybaı batyrdyń 220 jyldyǵyna, qazaqtyń batyr qyzy Mánshúk Mámettiń týǵanyna 100 jyl tolýyna oraılastyrylyp otyr. Aıta ketý kerek Ult qundylyqtaryn saqtaý men nasıhattaýǵa baǵyttalǵan Qazaq kúntizbesi sheńberinde qolǵa alynǵan onkúndikti uıymdastyrýǵa muryndyq bolǵan qalamyzdaǵy «Qazaq club» músheleri ótken jyly 15 qarasha - Batyrlar kúnine oraı qazaqtyń áskerı murasyn nasıhattaıtyn «Jaýyngerlik Dańq lentasynyń tusaýkeserin ótkizgen bolatyn.
