Qaraǵandy oblysy Qarqaraly aýdanynyń ákimi Ádiljan Arǵynov órtke qatysty jerlesterine úndeý joldady. Bul týraly ol Instagram-daǵy paraqshasynda jarııalady, dep habarlaıdy “Adyrna” ulttyq portaly.
Aýdan basshysy aldymen jerlesterine órt sóndirý jumystary týraly aqparat berdi.
“Qurmetti aýdan turǵyndary! Ózderińizge málim, aýdanymyzda úlken dala órti bolyp jatyr. Osy órt sóndirý jumystaryn durys uıymdastyrý úshin Terekti aýylynda jedel shtab qurylǵan. Men jáne oblys ákiminiń orynbasary osy jerdemiz. Jalpy órt sóndirý jumystaryna 386 adam, 64 tehnıka, sonymen qatar, TJM men Qorǵanys mınıstrliginiń tikushaqtary jumyldyrylǵan”, - dedi ol.
Artynsha Ádiljan Arǵynov áleýmettik jelilerde órt sóndirý jumystaryna qatysty jalǵan aqparat tarap jatqanyn aıtty.
“Qadirli jerlester! Qazir áleýmettik jelilerde kómek kórsetý nemese qarajat jınaý boıynsha ártúrli málimet tarap jatyr. Osyǵan oraı, jaýapty mamandar kómekti durys úılestirmegen nemese uıymdaspaǵan degen aqparattyń jalǵan ekenin eskertkim keledi. Qazir barlyq qajetti kúsh-quraldarymyz jetkilikti. Sarbazdarymyzdyń tamaǵy, demalatyn oryndary, sonymen qatar, janar-jaǵarmaı materıaldary tolyq qamtamasyz etilgen. Sondyqtan qazir barlyq órt sóndirý jumysy tıisti deńgeıde uıymdastyrylǵan”, - dedi ol.
Osy rette aýdan ákimi turǵyndardy sabyrǵa jáne jalǵan aqparatqa senbeýge shaqyrdy.
