Qaraǧandy oblysy Qarqaraly audanynyŋ äkımı Ädıljan Arǧynov örtke qatysty jerlesterıne ündeu joldady. Būl turaly ol Instagram-daǧy paraqşasynda jariialady, dep habarlaidy “Adyrna” ūlttyq portaly.
Audan basşysy aldymen jerlesterıne ört söndıru jūmystary turaly aqparat berdı.
“Qūrmettı audan tūrǧyndary! Özderıŋızge mälım, audanymyzda ülken dala örtı bolyp jatyr. Osy ört söndıru jūmystaryn dūrys ūiymdastyru üşın Terektı auylynda jedel ştab qūrylǧan. Men jäne oblys äkımınıŋ orynbasary osy jerdemız. Jalpy ört söndıru jūmystaryna 386 adam, 64 tehnika, sonymen qatar, TJM men Qorǧanys ministrlıgınıŋ tıkūşaqtary jūmyldyrylǧan”, - dedı ol.
Artynşa Ädıljan Arǧynov äleumettık jelılerde ört söndıru jūmystaryna qatysty jalǧan aqparat tarap jatqanyn aitty.
“Qadırlı jerlester! Qazır äleumettık jelılerde kömek körsetu nemese qarajat jinau boiynşa ärtürlı mälımet tarap jatyr. Osyǧan orai, jauapty mamandar kömektı dūrys üilestırmegen nemese ūiymdaspaǧan degen aqparattyŋ jalǧan ekenın eskertkım keledı. Qazır barlyq qajettı küş-qūraldarymyz jetkılıktı. Sarbazdarymyzdyŋ tamaǧy, demalatyn oryndary, sonymen qatar, janar-jaǧarmai materialdary tolyq qamtamasyz etılgen. Sondyqtan qazır barlyq ört söndıru jūmysy tiıstı deŋgeide ūiymdastyrylǧan”, - dedı ol.
Osy rette audan äkımı tūrǧyndardy sabyrǧa jäne jalǧan aqparatqa senbeuge şaqyrdy.
Ūqsas jaŋalyqtar
