Pavlodar oblysyna qarasty Aqsý qalasynyń turǵyndaryn qystan aman shyǵýdyń qamy mazalaıdy. Bul shahar da Ekibastuzdyń kebin kııýi múmkin. Sebebi, jergilikti qazandyqtar ábden eskirgen. Al osydan bes jyl buryn qurylysy bastalyp, mıllıardtaǵan qarajat jumsalǵan jańa qazandyq áli de iske qosylmaı keledi. Turǵyndar ótinishinen keıin atalǵan máselege qatysty QR Parlamenti Májilisiniń depýtattyǵyna kandıdat Jarqynbek Amantaı úndeý jarııalap, jaýaptylardy jazalaýdy talap etti, dep habarlaıdy “Adyrna” ulttyq portaly.
Aqsý qalasynda da Ekibastuzdaǵy jaǵdaı qaıtalanýy múmkin. Sebebi qazir jumys istep turǵan qazandyqtar ábden tozǵan. Kez-kelgen ýaqytta isten shyǵýy yqtımal. Onymen qosa, qalanyń barlyq bóligine jylý tartý múmkin bolmaı otyr. Sol sebepten osydan bes jyl buryn munda jańa qazandyq salýdy qolǵa alǵan. Jospar boıynsha bul nysan 2020 jyly iske qosylýy kerek edi. Alaıda, ol – «saqaldy» qurylysqa aınaldy. Áýel basta jańa qazandyq qurylysyna 11 mlrd teńge jumsaý josparlanǵan edi. Nátıjesinde, «qarajat jetpeı jatyr» degen jeleýmen osy kúnge deıin 12 mlrd teńge shyǵyndaldy. Biraq, nátıje joq.
Másele munymen aıqtalmaıdy. Jańa qazandyq iske qosylsa, jylýǵa degen tarıf birneshe esege ósip ketedi. Áıtpegen jaǵdaıda, joba ózin ózi aqtaı almaıdy. Onyń jumys isteýine de qyrýar qarajat qajet.
Bul másele boıynsha jergilikti turǵyndar QR Parlamenti Májilisiniń depýtattyǵyna kandıdat Jarqynbek Amantaıǵa shaǵymdandy. Ol, óz kezeginde, aqsýlyqtarmen júzdesip, máseleni zerdelep qaıtty.
Aqsý qalasynyń turǵyndarymen kezdestim. Olardy da ekibastuzdyqtar sııaqty "jylýmen ne bolady?» suraq mazalaıdy. Aqsý qazandyǵy - Astanadaǵy LRT sııaqty jaýapsyzdyqtyń eskertkishine aınalǵandaı. Sondyqtan, oǵan kináli basshylardy qazir taýyp, shetelge qashyp ketpeı turǵanda jazalaý kerek. Eger qazandyq iske qosylsa, tarıf boıynsha suraq týyndaıdy. Ol eki jarym ese ósedi! Barlyq shyǵyndy kináli jandar óteýi tıis. Aqsý turǵyndary jáne memlekettik bıýdjeti bireýdiń qateligi úshin zardap shekpeýi tıis. Jalpy, bizge osyndaı qazandyq kerek pe? Táýelsiz sarapshylardy tartyp, qalany Aqsýdaǵy jylý elektr stanııasynan qýattandyrý múmkindigin zerdelegen jón sııaqty. Jergilikti ákimdik osy máselelerdi sheshýdi dereý qolǵa alýy mindetti. Áıtpese munda da Ekibastuzdaǵy jaǵdaı qaıtalanýy múmkin, - dedi Jarqynbek Amantaı.
